حرکت تبدیلی کی علامت ہے اور تبدیلی تحریک کا خاصہ۔تحریک بذات خود بھی حرکت ہی سے عبارت ہے۔وقت کا گزرنا ایک فطری امر ہے لیکن اس گزرتے وقت کے ساتھ تبدیل ہونا حقیقی زندگی کا ثبوت ہے۔
ایس آئی اوآف انڈیا کی پندرہویں میقات کا ایک سال مکمل ہوا۔ تنظیم کی زندگی میں جس قدر اہمیت منصوبہ بندی کی ہوتی ہے اتنی ہی (بلکہ اس سے زیادہ) اہمیت جائزہ اور احتساب کی ہوتی ہے۔اس تحریر میں زونس کی یک سالہ کارکردگی کے پس منظر میں چند باتیں پیش نظر ہیں۔
میقات کی ابتداء میں پالیسی کی وضاحت کے دوران یہ بات عرض کی گئی تھی کہ مختلف محاذوں پر ہمہ جہتی اور توازن کے ساتھ کام کرنے کی ضرورت ہے۔الحمد للہ زونس کی یک سالہ کارکردگی پراجمالی نظر ڈالنے سے اطمینان ہوتا ہے کہ زونس نے ہمہ جہتی انداز میں کام کیا ہے۔ اسٹوڈنٹس ایکٹیوزم کے محاذ پر کیرالا کے ساتھ اس میقات میں ویسٹ بنگال نے بھی معیاری کام کیا ہے۔ چند میقات پہلے ویسٹ بنگال زون سے متعلق یہ تصور تھا کہ وہاں اسٹوڈنٹس ایکٹیوزم کے لئے نہ ریاستی اور تعلیمی حالات موافق ہیں اور نہ وابستگان کا مزاج۔۔۔ لیکن ویسٹ بنگال کی پرجوش قیادت اور فعال ٹیم نے اس تصور کو غلط ثابت کیا۔میقات رواں میں اس زون نے کیمپس کیمپس تنظیم کی آواز کو بلند کیا۔ مولانا آزاد کالج میں یونین الیکشن میں تاریخی جیت کے ساتھ تنظیم کے پرچم کو بلند کیا۔طلبہ میں بڑھتے ظلم و زیادتی اور تشدد کے رجحان کے خلاف پوری ریاست میں پر اعتماد اور نڈر ہوکر احتجاج کیا۔ تعلیمی سال کے آغاز پر Massive Program in Campusesکی عمدہ مثال پیش کی ۔ریاستی تعلیمی ایجنڈے پر اثر انداز ہونے کے لئے سیمینار اور سمپوزیم کا انعقاد بھی کیا اور ریلی اور دھرنوں کا اہتمام بھی۔ کرناٹک اور آندھراپردیش تنظیمی اعتبار سے بڑے زون ہونے کے باوجود کیمپس میں نفوذ اور طلبائی رخ کے محاذ پر نسبتاََ کم متحرک تھے۔ لیکن اس میقات میں ان دونوں زونس نے کیمپس مرکوز سرگرمیوں میں قدرے اضافہ کیا ہے۔ طلبہ کی فلاحی سرگرمیاں اوراشوز کی لمبی فہرست اس کی علامت ہیں۔ یوپی سینٹرل اور مدھیہ پردیش ایسٹ نے افرادی قو ت کے محاذ پر شاندار اضافہ درج کرایا ہے۔ان زونس میں ممبران کی تعداد میں قریبا ۵۰؍ فیصد تک اور اسوسی ایٹس اور یونٹس و سرکلس کی تعداد میں تقریبا دوگنا اضافہ ہوا ہے۔ گجرات نے نازک سیاسی حالات میں اورمعمولی افرادی قوت کے ساتھ گجرات کی تنظیمی تاریخ میں پہلی مرتبہ حلقہ کی سطح پر عظیم الشان اسٹوڈنٹس کانفرنس کا انعقاد کیا ہے۔ راجستھان اور تامل ناڈو نے علاقائی سطح پر کامیاب کانفرنسوں کی شکل میں بڑے پیمانے پر تنظیم کا تعارف عام کیا ہے۔ مہاراشٹر نارتھ اور ساؤتھ زون نے دعوتی محاذ پر نہ صرف کیڈر کو متحرک کیا ہے بلکہ قبول اسلام کے حیرت انگیز واقعات بھی ان زونس میں سامنے آئے۔ نیز مخصوص ریاستی حالات میں دعوت دینے کی جانب پیش قدمی کی۔یوپی مغرب اور بہار زون نے ’ریاستی تعلیمی کارواں‘ اور’ تعلیم بچاؤ‘ جیسے موضوعات پر منفرد اور موثر پروگرام کئے۔اے ایم یو زون نے علی گڑھ مسلم یونیورسٹی کے اقلیتی کردار کے سلسلے میں عظیم الشان سیمینار کے ذریعے اسے موضوع بحث بنایا۔ جامعہ ملیہ اسلامیہ زون نے ایک اشو کے سلسلے میں فیس بک پر مہم چھیڑکر یہ ثابت کیاکہ سوشل نیٹ ورکنگ سائٹس انقلابی تبدیلیوں کے لئے موثر ذریعہ ثابت ہو سکتے ہیں۔یوپی ایسٹ زون نے تقسیم زون کے بعد انتہائی کم افرادی اور مالی وسائل کے ساتھ توسیع و استحکام پرلگ کر اور یکسو ہوکرتوجہ دی۔ جھارکھنڈ اور مدھیہ پردیش مغرب نے دینی مدارس کے سلسلے میں کامیاب پروگرام کے ساتھ ثابت کیا کہ دینی مدارس میں کام کرنے کے وسیع امکانات موجود ہیں۔۔۔۔۔الغرض مختلف محاذوں پر تقریبا تمام زونس نے ہمہ جہت انداز میں کام کیا ہے۔ ان کاوشوں میں صرف ہمارے زونل ذمہ داران مبارکباد کے مستحق نہیں بلکہ وہ ہزاروں لاکھوں ممبران اور اسوسی ایٹس بھی قابل مبارکباد ہیں جنہوں نے ا پنا پسینہ بہاکر‘ لہو جلا کر‘ وقت گھلاکر اورصلاحیت لگاکر کاغذ کے ان منصوبوں کو عمل کی دنیا میں نافذ کیا۔۔۔۔۔ یا رب العالمین ! ہمارے ان تمام دوستوں کو ان کی کاوشوں کا بہترین صلہ عطاکر۔۔۔۔
لیکن ساتھیو! مومن کی نظر اپنی خوبیوں سے زیادہ اپنی کمزوریوں پر ہونی چاہئے۔ حقیقت پسندانہ احتساب‘ بے لاگ جائزہ اور کمزوریوں پر کڑ ی تنقیداگر سنجیدگی کے ساتھ ہو تو دل شکنی اور مایوسی کا باعث نہیں بنتی بلکہ منزل کی جانب تیز رفتار کردیتی ہے۔۔۔لیکن اس جائزہ و احتساب کے لئے سب سے پہلے یہ ضروری ہے کہ خود مقصد کا شعور بھی واضح ہو اور منزل کے مراحل اورراستے کے سنگ ہائے میل کا بھی پتہ ہو۔ اسی احساس کے ساتھ چند باتیں مزید پیش کر نی ہیں۔۔۔۔
سب سے پہلے ایس آئی او کے وابستگان کو اپنے کندھوں پر موجود ذمہ داری کا احساس پیدا کرنا ہے۔ ایس آئی او صرف ایک تنظیم یا این جی اونہیں ہے۔ تحریک اسلامی نے اسے انتہائی اہم محاذ سونپا ہے۔ تحریک اسلامی اس ملک اور سماج کی فکری اور نظریاتی امامت کرنا چاہتی ہے۔ اس عظیم کام کے لئے افراد کی فراہمی SIOہی کے ذمہ ہے۔ گویاSIOکے رخ اور ترجیحات‘ حرکت اور رفتار کا راست اثر تحریک اسلامی پر اور اس کے توسط سے ملک و سماج کے مستقبل پر پڑتا ہے۔ SIOکو بلاشبہ کیمپسوں کی نئی صورت گری کرنا ہے۔طلبہ اور نوجوانوں کے ذہنی مشاکلہ کو تبدیل کرنا ہے۔ ان کے اخلاق و کردار کو بھی سنوارنا ہے اور ان کی صلاحیتوں کوبھی ثمر آوربنانا ہے۔ یہ وژن اپنے اندر پیدا کرنا ہے کہ وہ طلبہ اور نوجوانوں کے قافلے کی ڈرائیونگ فورس بنے گی۔ فحاشی اور عریانیت کے خلاف بند باندھے گی۔ صحت افزاء Entertainment کا ماحو ل پیدا کرے گی۔ سنجیدہ بحثوں کا آغاز کرے گی۔ مسائل کے حل میں پیش قدمی کرے گی۔ کمزور اورمظلوم طلبہ کی آواز بن کر ابھرے گی۔ اسے باطل عقائد ‘ گمراہ کن افکار اور استحصالی نظام کا مدلل اور علمی پوسٹ مارٹم کرنا ہے۔ فلسفۂ تعلیم اور مقاصد تعلیم پر سوالیہ نشان لگا کر تعلیم کے اصل مقاصد پر نہ صرف بحثوں کا آغاز کرنا ہے بلکہ اس سمت متبادل کے طور پر کچھ ٹھوس کام کرنا ہے۔ تعلیم کے ایجنڈے پر اثر انداز ہونا ہے۔مراکز قوت (Power Structures) پر توجہ دینی ہے ۔اپنی صفوں میں ایسے بہترین قلم کار‘ تجزیہ نگار‘ مبصرین‘ میڈیا پرسنس‘ وکلاء‘ سائنٹسٹ‘ محققین ‘ خدمت گزار‘ ماہرین سماجیات و معاشیات‘ اداکار‘ آرٹسٹ وغیرہ کی ایسی کھیپ کی کھیپ تیار کرنی ہے جو ایک جانب فنی طور پر ماہر بھی ہواور اور فکری و نظریاتی طور پر مضبوط بھی۔۔۔۔۔ یہی وہ کام ہے جو ایک نئے تمدن ‘ مثالی تمدن‘ الہی ہدایات پر مبنی تمدن کی تشکیل میں کلیدی اور دوررس اثرات کا حامل ہے۔اس کام کے لئے وابستگان ایس آئی او کو اپنی طویل المیعاد ذمہ داریوں کو بھی سمجھنا ہے اور مختصر المیعادتقاضوں کو بھی۔اور ان Long TermاورShort Term Goalsپر صحیح تناسب کے ساتھ توجہ دینی ہے۔ یہ بات واضح رہنی چاہئے کہ خدمت اسلام اور پروفیشنل زندگی دو علیحدہ علیحدہ چیزیں نہیں ہیں۔ تعمیر انسانیت کے لئے ان تمام شعبہ ہائے زندگی پر اثر انداز ہونا ضروری ہے۔ اس کام کے لئے ہر صلاحیت اور ہرفنی میدان اہمیت کا حامل ہے۔ ’ہر فرد ہے ملت کے مقدر کا ستارا‘ کے مصداق ہر فرد اپنی مخصوص صلاحیت سے اثرانداز ہو سکتا ہے۔ لیکن اس کام کے لئے لگ کر اور جٹ کر کام کرنے کی ضرورت ہے۔ صبر اور قربانی کے روایتی مفہوم کو بدلنے کی ضرورت ہے۔ لائبریریز میں ‘ لیباریٹریز میں ‘ دانش گاہوں میں ‘ تعلیمی اداروں میں‘ سیمینارہال میں‘ ڈسکشن روم میں جن تبدیلیوں کے بیج بوئے جاتے ہیں وہ ہرگز سڑکوں اور چوراہوں پرنہیں بوئے جاسکتے۔ تعلیم‘ معاشیات ‘سیاست ‘ تجارت اور تہذیب و تمدن کے دیگر تمام مظاہر افکار و نظریات کی دنیا ہی سے جلوہ گر ہوتے ہیں۔ ان دور رس مقاصد کے حصول کے لئے ہمیں سیکھنے اور کرنے کا مزاج پیدا کرنا ہے۔ اقدامی مزاج پیدا کرنا ہے۔ تعمیر کے ہر پروگرام میں حصہ لینا ہے۔ ایک ایک فرد اور ایک ایک صلاحیت کو قیمتی جاننا ہے۔ہر کیمپس اور ہر یونیورسٹی میں قدم جمانے ہیں۔سماج کے ایک ایک شعبہ کو تبدیلی کا ذمہ دار سمجھنا ہے۔تنظیم کے اس وژن کو ذہن میں رکھتے ہوئے ہمیں اپنے کاموں کا جائزہ لینا ہے۔
) اس تناظر میں افرادی قوت میں بحیثیت مجموعی ہماری شرح بہت سست رفتار ہے۔ تین زون کو چھوڑ کرکوئی بھی زون ممبران کی تعداد میں ۲۵فیصد گروتھ ریٹ درج نہیں کرا سکا۔ اکثر زونس نے ۱۰ فیصد سے بھی کم گروتھ ریٹ حاصل کی ہے اور بعض نے تو منفی گروتھ ریٹ درج کی ہے۔ ظاہر ہے یہی ممبران ہماری تنظیم کا سب سے قیمتی سرمایہ ہیں۔ انہی ممبران کی تربیت اور ٹریننگ سے ہمیں سماج پر اثر انداز ہونا ہے۔ یہ ہمار ے لئےsource Re کی حیثیت رکھتے ہیں۔
یونٹس کی تعداد میں اضافہ بھی کافی کم ہواہے۔ دیئے گئے ٹارگیٹ (موجودہ یونٹس میں ۲۵ فیصد کا اضافہ) کا نصف بھی چند ہی زونس حاصل کرپائے ہیں۔ا ور اس سے زیادہ اہم بات یہ ہے کہ ہماری باوزن اور مضبوط یونٹس میں کوئی قابل قدر گروتھ نہیں ہوئی۔ میقات کی ابتدا میں بتایا گیا تھا کہ ہمیں اپنی بیشتر یونٹس کو۵ممبران سے زائد والی یونٹ میں تبدیل کرنا ہے۔ ملکی سطح پر تما م یونٹس کی تعداد کا صرف ۲۰ فیصد حصہ5ممبران سے زائد پر مشتمل ہے۔ واضح رہنا چاہئے کہ یونٹس ہماری تنظیم کی اصل قوت ہیں۔کیمپسزاور سماج پر اثر انداز ہم یونٹس ہی کے حوالے سے ہوتے ہیں۔کمزور اور لڑکھڑاتی یونٹس کے ساتھ ہم ہمہ جہت اور موثر کام نہیں کرسکتے۔
اکثر زونس علاقائی طور پر عدم توازن کا شکار ہیں۔کئی زونس ایسے ہیں جہاں نئے ممبران کی ۹۰ فیصد تعداد ایک مخصوص علاقہ/ڈویژن سے تعلق رکھتی ہے۔صرف ممبران کی تعدا د نہیں بلکہ سرگرمیوں کے اعتبار سے بھی علاقائی سطح پر یہ عدم توازن محسوس ہوتا ہے۔حلقہ کی سطح پر ہونے والی بیشتر سرگرمیاں چند علاقوں تک محدود ہے۔ یہ افسوسناک صورت حال بعض بڑے زونس میں بھی نمایاں ہے۔
زونس اور یونٹس کے کاموں میں بھی ایک توازن درکارہے۔ بعض زونس میں تمام سرگرمیاں زون سے Spoon Feedکی جاتی ہیں تو چند زونس ایسے بھی ہیں جہاں زونس کی رپورٹ کا بیشتر حصہ یونٹس سے ترکیب پایا ہے۔ اس سلسلے میں ایک حسین امتزاج پیدا ہونا چاہئے۔ سرگرمیوں کے اعتبار سے یونٹس کو زون کی سرگرمیوں کا ’عکس‘ نہیں بننا ہے بلکہ اپنی منفرد پہچان بھی پیدا کرنی چاہئے۔
افرادی قوت میں عدم توازن (Disparity) کا حیرت انگیز مظہر ملکی سطح پر بھی ہے۔ مثلا کیرالا‘ کرناٹک ‘ آندھراپردیش‘ مہاراشٹر اور ویسٹ بنگال ان ۵ریاستوں میں ہمارے ممبران کی ٹھیک ۷۵ فیصد تعداد موجود ہے اور بقیہ۲۲زونس اور ڈیولپنگ زونس میں صرف ۲۵ فیصد ممبران ۲۰۱۱ ؁ء میں بننے والے کل نئے۶۴۱ممبران میں سے ۵۲۳ کاتعلق بھی مذکورہ بالا۵ریاستوں سے ہے (۸۱فیصد)جبکہ بقیہ زونس سے صرف۱۱۸نئے ممبر بنے ہیں۔ یہ صورت حال بڑی تشویش ناک ہے۔
) اعداد و شمار کے حوالے سے سب سے زیادہ قابل توجہ پہلو ہمدرد (Sympathisers)میں اضافہ کا ہے۔ تنظیمی اصطلاح میں ہمدرد سے مراد وہ غیر مسلم طالب علم یا نوجوان ہے جو ہمارے مقاصد سے اتفاق رکھتا ہو اور وقتا فوقتا ہماری سرگرمیوں میں شریک ہوتا ہو۔ اس سال ہمدرد میں شرح اضافہ بہت معمولی ہے۔ یہ پہلو اس لئے اہم ہے کہ گزشتہ کئی میقاتوں سے ہم یہ بات کہتے آرہے ہیں کہ ہمارے مخاطب تمام طلبہ و نوجوان ہیں۔ ہم مذہبی بنیادوں پرطلبہ کے درمیان اس طرح کا خط امتیاز نہیں کھنچنا چاہتے ہیں کہ ہماری فلاں سرگرمیوں پر صرف مسلم طلبہ کی اجارہ داری ہے اور فلاں میں غیر مسلم دوستوں کو بھی آنے کی ’گنجائش‘ ہے۔ ’ہم‘ اور ’وہ‘ میں تقسیم کرنے کا یہ مزاج داعی تحریک کے شایان شان نہیں ہے۔ Polarisationہندوستانی مخلوط سماج کے لئے انتہائی خطرناک ہے۔ ہم نے بہت سوچے سمجھے منصوبے کے تحت گزشتہ چند میقاتوں سے مسلم طلبہ اور غیر مسلم طلبہ کے الفاظ کی بجائے صرف طلبہ کا لفظ استعمال کیا ہے۔اس کا مقصود یہ ہے کہ ہماری ہرسرگرمی کے مخاطب تمام طلبہ ہیں۔ہمیں اپنے طرز عمل سے قرآن حکیم کے ’للناس‘ اور ’’للعالمین‘ کے آفاقی مزاج (Universal Approach) کی نمائندگی کرنی ہے۔ہمدردوں کی تعداد میں بہت معمولی اضافہ اس بات کاتأثر دیتا ہے کہ ایک جانب ہمارا دعوتی کام متاثر ہورہا ہے اوردوسری جانب یہ حقیقت بھی واضح کرتا ہے کہ ہماری عمومی سرگرمیوں (اشوز‘ سیمینارس‘ طلبہ کی فلاحی سرگرمیاں‘ کیمپس سرگرمیاں‘ سماجی خدمت) میں بھی ہم غیر مسلم دوستوں کو اپنا سمجھنے کے روادار نہیں ۔مجھے بڑا افسوس ہوا کہ بعض زونس نے تو اپنی ریجنل یا ریاستی کانفرنس کے موضوع‘ اپروچ‘ تشہیر اور شرکت تمام میں غیر مسلم طلبہ کو مکمل محروم کردیا۔ اور اپنے مقاصد میں تحریرا لکھ دیا کہ یہ صرف مسلم طلبہ اور نوجوانوں کے لئے ہے۔ صد افسوس! مجھے قوی امید ہے کہ میقات کے دوسرے سال اس رویہ میں بڑی تبدیلی آئے گی۔
) اس میقات میں یہ بات بھی طے کی گئی تھی کہ کلچرل ایکٹیوزم پر خصوصی توجہ دی جائے گی۔ثقافتی ذرائع (Cultural tools) فی زمانہ ذہن سازی اور Opinion Buildingکا بلامبالغہ سب سے موثر ہتھیار ہیں۔ بطور خاص طلبہ اور نوجوان طبقہ تو اسی سے متاثر ہے۔ ہمیں مین اسٹریم کلچرل سرگرمیوں پر اثر انداز بھی ہونا ہے اور کیمپسیز کے اندر ہونے والی کلچرل سرگرمیوں میں بھی شمولیت اختیار کرنی ہے۔ ان سرگرمیوں میں فحاشی اور عریانیت اور بے مقصدیت کے سبب ان سے Aloof نہیں رہنا ہے بلکہ ان میں شامل ہوکر اور ان پر اثر انداز ہوکر ان کے رخ کو تبدیل کرنا ہے۔ اس میں کوئی شبہ نہیں ہے کہ ہمارے حلقوں میں بہترین کلچرل صلاحیتیں موجود ہیں۔ ضرورت صرف ان کے Exposureکی ہے۔ ڈرامے‘ نکڑناٹک‘ مونو ایکٹ ‘ کارٹون ‘ پینٹنگ ‘ فلمیں‘فوٹوگرافی‘ڈاکیومینٹری‘ شاعری‘ افسانہ او ناول نگاری غرض ہر قسم کی سرگرمی کو ہمیں اپنے حلقہ میں جگہ دینی ہے۔ اس جگہ دینے کے لئے کنجوسی کا اور سوتیلے پن کا رویہ اختیار نہیں کرنا ہے۔ ہمارے عمومی اور ریگولر پروگرام میں ان کلچرل سرگرمیوں کے لئے فاضل وقت نہیں رکھنا ہے۔ بلکہ باضابطہ اسے جگہ دینی ہے۔ ایک اضافی سرگرمی کے طور پر نہیں بلکہ Unavoidable Activity کے طور پر۔۔۔۔ صرف حلقہ کی سطح پر نہیں بلکہ یونٹس اور کیمپس کی سطح پر ہمارے فعال کلچرل فورمز بننے چاہئے۔ Cultural Talent Huntکی باضابطہ یا غیر رسمی طور پر مستقل مہم چھیڑی جانی چاہیے۔
) ہماری طلبائی سرگرمیوں میں الحمدللہ اضافہ ہورہا ہے۔ الیکن ان میں سے بیشتر سرگرمیاں کیمپس کی چہار دیواریوں سے باہر ہیں۔نیز کیمپس میں ہونے والی سرگرمیوں میں بھی بیشتر سرگرمیاں ان وابستگان تنظیم کے ذریعے ہے جو خود کیمپسیز کا حصہ نہیں۔ نتیجہ یہ ہے کہ ہم کیمپسیز میں جذب نہیں ہو پارہے ہیں۔ وہاں اثر انداز نہیں ہو پارہے ہیں۔ ہم گوشوں اور کونوں میں جگہ بنا رہے ہیں۔ظاہر ہے کہ اس سے یہ خوش فہمی تو ہے کہ ہم ’ سرگرم ہیں لیکن اصل دائرہ کار کیمپسیز ’سرد ‘ پڑے ہیں۔ ہمیں کمیپس کے طلبہ کومتحرک کرنا ہے اور انہی طلبہ کے ذریعے سے متعلقہ کیمپسیز میں اپنی جگہ بنانی ہے۔
کئی اہم کیمپسیزمیں ہم نفوذ کرنے میں سست واقع ہو رہے ہیں۔Prestigious Institution‘ معاشیات‘ قانون‘ جرنلزم‘ سوشل سائنسیز‘ ریسرچ انسٹی ٹیوٹ جیسے اہم اداروں میں ہماری نمائندگی نہیں کے برابر ہے۔ تنظیم کے وژن کو سامنے رکھتے ہوئے ہمیں ترجیحی طور پر اور شعوری کوششوں کے ذریعے یہاں نفوذ کی کوششیں کرنی ہیں۔
) Social Engagementپر ہمیں مزید یکسو ہونا ہے۔ سماج اور طلبہ برادری کے اصل مسائل اور اشوز سے خود کو جوڑیئے۔ ایسا نہ ہو کہ معاشرے کے سماجی‘تعلیمی‘ سیاسی اور اخلاقی مسائل کچھ ہوں اور ہم ان سے بے نیاز کسی اور دنیا میں ’مصروف‘ ہوں۔ ان کے بیچ رہئے۔ Contributeکرنے کا مزاج اور بڑھنا چاہئے۔ میرا احساس ہے کہ فلاحی سرگرمیوں کے لحاظ سے ہم اب بھی کافی پیچھے ہیں۔ محض بیداری لانے والے پروگرامز کے مقابلے ٹھوس اور نتیجہ خیز کاموں کا تناسب بڑھایا جاسکتا ہے۔ شاہد ہم اپنے آپ کو ٗUnderstemiteکرتے ہیں۔ ملت اور سماج کی حقیقی ضرورتوں کا تعین کیجئے۔
) اپنی ذاتی تر بیت اور اپنے کو سنوارنے اور نکھارنے کا عمل مزید تیز تر ہونا چاہئے۔ فرد کی اصلاح اور ارتقاء ہماری ساری کوششوں میں سب سے مقدم ہے۔ اجتماعی ماحول اس قدر جاندار ہونا چاہئے کہ فرد تیزی کے ساتھ تزکیہ( Journey from Imperfection to Perfection) کی جانب سفر کرتا چلا جائے۔ برائی پر عمل کرنا اس کے لئے محال ہوجائے۔ چھوٹی چھوٹی نیکیوں کا وہ حریص ہو‘ اعلی ظرفی اور وسیع النظری کا وہ مظاہرہ کرے۔معاملات شفاف ہوں۔تعلقات گھر میں‘ معاشرے میں‘ کیمپس میں‘ کمپنی میں اور دوستو ں کے ساتھ سب جگہ بہتر ہوں۔ ہر ایک کے حقوق ادا ہوں۔ تنظیمی جدوجہد سماج میں رہنے والے لوگوں کی حقوق تلفی کا سبب نہ بنے۔قول و عمل میں تضاد نہ محسوس ہو۔ ایمانداری کا درس دینے والا ہمارا طالب علم Malpracticesکا شکار نہ ہو۔ پاکیزگی کی گفتگو کرتے کرتے انٹرنیٹ اور موبائیل پر موجود فحاشی کے سمندر میں پیر پھسل نہ جائیں۔ عدل و مساوات کی دہائی دینے والے بچھڑے طبقات کے طلبہ کے ساتھ اچھوتے رویہ کا مظاہرہ نہ کریں۔ مطالعہ کا میدان وسیع ہو۔ مطالعہ مستقل ہو‘ اپنی اصلاح لئے ‘ اپنے شعور کو مضبوط کرنے کے لئے ہو نہ کہ Information Boxبننے کے لئے۔ ہر کام کی بنیاد ’شوق‘ بنے۔ پیارے رسول ﷺ نے فرمایا۔ ’شوق میری سواری ہے‘ ۔ اپنی منزل تک پہنچنے کے لئے شوق کی سواری پر بیٹھئے۔اصل اور آخری منزل(جنت الفردوس) کو ہر لحظہ نظروں کے سامنے رکھئے۔ اور ان سب کے لئے قرآن حکیم سے اٹوٹ ‘ والہانہ اور شعوری رشتہ بنائے رکھئے۔۔۔
قرآن میں ہو غوطہ زن اے مرد مسلمان اللہ کرے تجھ کو عطا جدت کردار
کردار کا نکھار قرآن سے تعلق کے بغیر ممکن نہیں۔۔۔۔۔
ساتھیو! دنیا اس وقت تبدیلیوں کے دور سے گزر رہی ہے۔ تغیر اسکوائر اور تحریر اسکوائر سے Occupy Wall Street Movementتک ایک تبدیلی کا زمانہ ہے۔ اس پورے منظر نامہ کی خصوصیت یہ ہے کہ Even an Ordinary man can change the Society (ایک عام آدمی بھی سماج کو بدل سکتا ہے)۔ اپنی قوت کو پہچانئے۔۔۔۔ مواقع کی دنیاہے۔۔۔
موسم اچھا‘ پانی وافر‘ مٹی بھی زرخیز جس نے اپنا کھیت نہ سینچا وہ کیسا دہقان

محمداظہرالدین

مجھے یہ کہنے کی ضرورت نہیں کہ یہ کیا چیز ہے۔ یہ نوجوان نسل کے ذہنوں میں نمودارہونے والا تازہ ترین دھماکہ (BUZZ) ہے۔ لیکن میں نے یہاں اس کا حوالہ کیوں دیا ہے؟ آخر ہم لوگ (پرانی نسل کے لوگ)موجودہ کلچر کے بارے میں یہی سب کچھ سوچتے ہیں۔۔۔ بے معنیٰ ، بے سمت، کسی آہنگ کے بغیر۔ جیسے کہ کولاوری کا یہ گانا۔ لیکن حقیقت یہی ہے کہ ہر پرانی نسل کا خیال نئی نسل کے متعلق یہی ہوتا ہے کہ وہ ان کے کلچر کی پیروی نہیں کررہی ہے۔ اس لئے کلچر بذات خود اچھا یا برا نہیں ہوتا بلکہ یہ پرانے کلچر سے ہی اخذ کیا جاتا ہے اس معمولی تبدیلی کے ساتھ کہ اس میں نئی ٹیکنالوجی اور نئی معلومات کا اضافہ ہوجاتا ہے۔ اس طرح یہ سمجھنا اہم ہوجاتا ہے کہ کلچر میں کیا چیزیں شامل ہوتی ہیں او ر کیا چیز اسے عوام میں پاپولر بنادیتی ہے۔ اسی کے ساتھ یہ ہمیں یہ بھی سمجھاتا ہے کہ انسانی زندگی کے ان مختلف پہلوؤں کو نوجوان نسل میں کیسے لایا جائے جن کو ہم عام کرنا چاہتے ہیں۔
پاپولر کلچر کیا ہے؟
کلچر ایک ایسا لفظ ہے جس کے کئی معنیٰ پائے جاتے ہیں۔ البتہ بالعموم اس کا استعمال مندرجہ ذیل معنوں میں کیا جاتا ہے۔
*ہیومنیٹیز اور فائن آرٹس کے میدانوں میں بہترین ذوق کا مظاہرہ جس کو بالعموم ہائی کلچر بھی کہا جاتا ہے۔
*انسانی معلومات، عقائداور رویوں کا ایک ملا جلا مظاہرہ جو سماجی علم اور خیالات پر منحصر ہوتا ہے۔
*کسی تنظیم ادار ہ یا گروہ کے مشترکہ رویے، اقدار ، مقاصد اور روایات۔
پاپولر کلچر دراصل کئی چیزوں کے مجموعے کا نام ہے جو موسیقی، ٹی وی، کتابیں، ریڈیو، کار، کپڑے، تفریحات وغیرہ پر مشتمل ہے اور یہ فہرست طویل تر ہے۔ اگر کوئی چیز کسی کے لئے پاپولر نہیں ہے تو عین ممکن ہے کہ کسی اور کے لئے ہو۔ ڈاکٹر رے براؤن کا مندرجہ ذیل قول پاپولر کلچر کی اچھی تشریح پیش کرتا ہے۔
پاپو لر کلچر لوگوں کے کسی گروہ ، چاہے وہ بڑا ہو یا چھوٹا، کے روزمرہ کلچر کا نام ہے۔
پاپولر کلچر ہماری روزمرہ زندگی کے تمام گوشوں کا احاطہ کرتا ہے۔
پاپولر کلچر لوگوں کی آوز ہے، ان کی روایات، ان کی پسند اور ناپسند اور ان کی روزمرہ کی زندگی کے معمولات ہیں۔
آج کل کس قسم کا پاپولر کلچر پایا جاتا ہے؟
پاپولر کلچر آج کل لوگوں کے ذہن و دماغ میں پایا جاتا ہے۔ یہ وہ معلومات ہیں جو وہ اخبارات، میڈیا اور میگزینس کے ذریعے حاصل کرتے ہیں۔ اگر پاپولر کلچر اس کا نام ہے کہ عوام الناس کن چیزوں میں دلچسپی لیتے ہیں تب یہ ہمارے اطراف پائے جانے والی ہر چیز میں موجود ہے۔
گھر میں اپنے اطراف چیزوں پر نظر ڈالئے ۔ کیا آپ کے پاس لیپ ٹاپ،کمپیوٹر، ٹی وی ، اسٹیریو، بیڈ، فریج، کار ، پلے اسٹیشن، کتابیں وغیرہ پائی جاتی ہیں یہ تمام پاپولر کلچر کا حصہ ہیں اس وجہ سے کہ لوگ ان چیزوں کو رکھنا پسند کرتے ہیں۔ آج کل متوسط طبقے کے کس گھر میں ان میں سے کم از کم ایک چیز بھی پائی نہیں جاتی۔
آج کل یہ پاپولر بات ہے کہ ٹی و ی دیکھی جائے اس لئے لوگ دیکھتے ہیں ، اسی طرح کھیل کھیلے جائیں، کرکٹ میچ دیکھا جائے، پارٹیز میں جایا جائے، گرل فرینڈ رکھی جائے، پیسے اڑائے جائیں وغیرہ۔ لوگ اس پاپولر کلچر میں رہتے اور بستے ہیں اور اس کا حصہ بننا چاہتے ہیں صرف اس بنا پر کہ وہ اس ماحول میں پلے بڑھے ہیں اور اسی ماحول میں سوچنے اور رہنے کے عادی بنائے گئے ہیں۔
یہ پاپولر کلچر صرف چند مخصوص اشیاء کے ذریعے اظہار کا نام نہیں جیسے ٹی وی ، ریڈیو وغیرہ بلکہ یہ جذبات اور روحانی احساسات کے اندر بھی پایا جاتا ہے۔ ہر شخص ڈر، نفرت،خوشی، غم ، پیار محبت جیسے مختلف جذبات سے گزرتا ہے۔ کچھ لوگوں کے پا س کوئی چیز پائی نہیں جاتی اور اس کو حاصل کرنے کے لئے وہ بے چین رہتے ہیں۔ یہ تمام احساسات ہر کوئی محسوس کرتا ہے اور یہ تمام اس کلچر کا بڑا حصہ ہیں۔
یہ پاپولر کلچر بالخصوص شہری علاقوں میں مرکوز ہے۔ چونکہ بڑے تعلیمی ادارے اور تکنیکی سہولیات بڑے شہروں میں بآسانی دستیاب ہوتی ہیں بالمقابل چھوٹے دیہاتوں کے اس لئے پاپولر کلچر شہروں سے شروع ہوتا ہے اور دیہاتوں اور چھوٹے شہروں تک پھیل جاتا ہے۔ اس بات میں کم ہی شبہ ہے کہ اس جدید دور میں بھی جغرافیائی فاصلوں اور ٹیکنالوجی کے استعمال کی بنیاد پرپاپولر کلچر مختلف گروہوں کو تقسیم کرتا ہے۔ کسی کالے اور گورے کے مابین کوئی فرق نہیں ہوگا لیکن کسی کپمیوٹر کے جاننے والے اور کمپیوٹر سے ناواقف فرد کے مابین کافی فرق پائے جائیں گے۔
سوسائٹی میں یہ کس طرح تشکیل پاتا اور پھیلتا ہے؟
جن طریقوں سے پاپولر کلچر نوجوانوں اور معاشرے کے درمیان جگہ بناتا ہے وہ لامحدود ہیں لیکن مختصراً صرف دو اہم ذرائع پر ہم بات کریں گے۔ پہلا ہیرو (رول ماڈل)ہے اور دوسرا ٹی وی ، خبریں ، ای میڈیا یا پرنٹ میڈیا ۔
ہر مشہور شخص پاپولر کلچر پر اثرانداز ہوتا ہے وہ کس طرح کے لباس پہنتا ہے ، کس طرح اداکاری کرتا ہے ، کس طرح نظر آتا ہے ، کس سے اس نے شادی کی ہے ، یہاں تک کہ اس کے بچے کون ہیں، ان کی زندگی کے ہر پہلو کے بارے میں لوگ جانتے ہیں، کیونکہ کسی میگزین میں لوگوں نے اسے پڑھ لیا یا یہ خبر ، ٹی وی یا کسی دوسرے طریقے سے دیکھ لی۔
ہیروز یا فلمی اداکار پاپولر کلچر کو نوجوانوں تک پھیلانے کے لئے ذرائع ابلاغ کا ضروری حصہ ہیں۔ہر کسی کا ایک پسندیدہ ہیرو ہوتا ہے یا کم از کم ان ہیروز کے بارے میں اسے کوئی چیز پسند ہوتی ہے۔ ہیروز لوگوں کے لئے رول ماڈل ہوتے ہیں ، خاص طور سے نوجوانوں کے لئے ، جن کا وہ احترام کرتے ہیں۔ لیکن یہ اداکار یا ہیروز صرف سپرمین کی طرح روایتی قسم کے ہیروز نہیں ، بلکہ ڈیوڈ بیکہم ،، دلائی لامہ ، عامر خان ، مہاتما گاندھی ، اور اسی طرح کی طرح مشہورشخصیتیں بھی ہیں۔
نیوز میڈیاسائنسدانوں اوردانشوران کا کام عام لوگوں تک پہنچاتاہے ، اکثر ان چیزوں کو جن میں موثر اپیل یامتاثر کن کشش ہوتی ہے ۔ مثال کے طور پر ،جئینٹ پانڈا(giant pandas )پاپولر کلچر کی ایک معروف شئے بن چکی ہے ، جبکہ parasitic worms نہیں بن پائے۔ میک ڈونلڈ ، پزا ہٹ اور KFC کے بارے میں کون نہیں جانتاہے ؟ آپ ماحول دوست اشیاء کے بارے میںیا جن لوک پال کے متعلق بحث کیوں کرتے ہیں؟ وجہ یہ ہے کہ ان چیزوں کے بارے میں بات کرناآج کل پاپولر ہے ۔
اورپاپولر کلچر کیسے پھیلتا ہے اور کیوں؟ اس کا کوئی واضح جواب نہیں ہے اگرچہ اس کے کئی جواب موجود ہیں۔یہ جان بوجھ کر یابنا سوچے سمجھے کیا جانے والا عمل ہوسکتا ہے ، بزنس پر مبنی یا نظریے پر مبنی کوئی تھیوری ہوسکتی ہے ، طاقت یا تحفظ کا کھیل ہوسکتا ہے ۔ اس کے پیچھے کئی دلائل دیئے جاسکتے ہیں مختصر اً یہ کہ یہ سماج کے اجتماعی فہم پر انحصار کرتاہے کہ وہ اپنی اگلی نسل کو کس طرح دیکھنا چاہتے ہیں۔
آج کے دور میں اس کلچر کی اہم خصوصیات
کلچر کی طرح ، پاپولر کلچرکی بھی چند خصوصیات ہیں۔ پاپولر کلچر سیکھا جاتا ہے ، اور اسے وضع کیاجاتا ہے۔ہم یہاں بجائے تفصیل کے اس کو آسان انداز میں پیش کرتے ہیں۔
1۔ تبدیلی ہی مستقل ہے۔ ۔۔تیزرفتار اور مختلف ذرائع ابلاغ کے اثرات کی بنا پرپاپولر کلچروقت کی ایک قلیل مدت کے اندر اندر بنتا بھی ہے اور ختم بھی ہوجاتا ہے۔ آپ جینس کی ایک مخصوص قسم آج پہن رہے ہوں گے اور کل یہ مختلف ہوگی۔ تبدیلیاں کافی تیز رفتار ہیں اور انسان مجبوراً انھیں اختیار کرلیتا ہے۔
2۔ بے صبری ہی صبر ہے ۔۔۔ اگر ہم پاپولر کلچر کا تجزیہ کریں تب ہم پائیں گے کہ یہ بیتاب ہوتا ہے۔ یہ اپنے پیروکاروں کو بے صبرا بناتا ہے۔ مثال کے طور پر براڈبینڈ انٹرنیٹ کنکشن آج کل پاپولر ہے اور اگر کہیں ہم سست رفتار ڈائل اپ دیکھیں تو ہمارا رد عمل کیا ہوگا؟یہ نیا کلچر بے صبراہے ، یہ زیادہ دیر تک انتظار نہیں کرسکتا ہے۔اس کی بہترین مثال فیس بک پر اپ لوڈ کئے جانے والے اسٹیٹس اپ ڈیٹ یا فوٹو اپ لوڈ ہیں ۔ فوری طور پر ہم توقع کرتے ہیں کہ کتنے Commentsیا Likesاس پوسٹ کے لئے آئے ہیں۔
3. تخلیقیت مقصد ہے ۔۔۔نوویشن کسی بھی کلچر کی بقا کے لئے اہم ہے۔پاپولر کلچر اپنے آپ کو مستقل تبدیل کرتا رہتا ہے تاکہ اپنے چاہنے والوں کو مسحور کرتا رہے۔ مثال کے طور پر ، عامر خان کی مختلف فلموں میں بالوں کا اسٹائل۔۔۔!
4 ۔تفریح میں سنجیدگی، سنجیدگی میں تفریح۔۔پاپولر کلچر سے ہم جن بنیادوں پر شکایت کرتے ہیں ان میں ایک اہم یہ ہے کہ وہ ہر چیز میں تفریح اور مزہ دیکھ لیتے ہیں۔ میں نے اپنے دفتر میں مشاہدہ کیا کہ جب لوگ کسی بھی واقعہ کے بارے میں بات کرتے ہیں تو ان کی توجہ کا پہلو یہ نہیں ہوتا کہ وہ کس قدر اہم تھا یا اس سے کیا مدد حاصل ہوئی بلکہ یہ کہ اس میں کیا مزہ حاصل ہوا۔مسئلہ یہ نہیں کہ لوگ پر معنی پیغامات سے بھی تفریح کا پہلو اخذ کرتے ہیں بلکہ یہ ہے کہ اس کے تفریحی پہلو پر ہی توجہ دی جائے اور بقیہ کو نظرانداز کردیا جائے۔
5۔ موبائل اور انٹرنیٹ ہی اصل دنیا ہے۔۔اگرچہ کہ موبائل اور انٹرنیٹ کلچر کو پھیلانے کا ذریعہ ہیں لیکن مجھے لگتا ہے کہ یہ پاپولر کلچر کی خاصیت بن گئے ہیں۔ کیوں؟ تیزرفتار انٹرنیٹ اور سب سے نیا موبائل رکھنا اب ایک فیشن بن گیا ہے۔. لوگ اپنے والدین یا بڑوں کے بالقابل گوگل سے زیادہ سوالات کرنے لگے ہیں۔۔!کسی نے سچ ہی کہا “گوگل نوجوان نسل کا سرپرست ہے”
6۔سماجی تعلقات رکھنا بہترین عمل ہے۔۔ میں نے چند دن قبل ہی فیس بک میں شمولیت اختیار کی۔ اس سے قبل ، جب بھی میں نے اپنے ساتھیوں سے کہاکہ میں سوشل میڈیا سے غائب ہوں انہوں نے سوچا میں مذاق کر رہا تھا۔ سوشل میڈیا پر موجودرہنا آج سب سے زیادہ پاپولر چیز ہے۔ اس نے بڑی تیزی سے ہمارے نوجوانوں کی سوچ کو تبدیل کر دیا۔ یہ ان کے دماغ اور روح کی تشکیل کررہا ہے۔ انہوں نے اپنے ارد گرد ایک مجازی دنیا پیدا کر لی ہے۔ ان کی زندگی سنہری پنجروں کی طرح ہوتی جا رہی ہے۔اسی کے ساتھ سوشل میڈیا کا استعمال خیالات ، انقلابات ، کاروباروغیرہ کی بڑے پیمانے پر تبلیغ کے لیے بھی کیا جارہا ہے۔ عرب انقلابات میں فیس بک کا کردار کون نہیں جانتا۔۔!!
7۔مختلف ایام منانا ۔۔ مختلف قسم کے ایام منانا آج کل پاپولر بن گیا ہے ۔ ویلینٹائن ڈے،روز ڈے، مدر ڈے، فادر ڈے، ۔۔۔فہرست لامتناہی ہے۔کسی مقصد کے لئے یا پھرمحض تجارتی فوائد کے لئے ان کو فروغ دیا جاتا ہے۔وجہ کچھ بھی ہو، لوگ کچھ نہ کچھ جشن منانا چاہتے ہیں۔
پاپولر کلچر کے مثبت پہلو
پاپولر کلچر کا تجزیہ کرتے ہوئے ہم سوچتے ہیں کہ یہ ناقابل برداشت ہورہا ہے۔اگرچہ اس کے نوجوان نسل پر بہت بڑے اثراتہیں، پرانی نسل اب بھی ان کے ساتھ شامل ہونے کے لئے جدوجہدمیں لگی ہوئی ہے۔ لیکن جلد یا بدیرانہیں ایسا کرنا پڑتا ہے بصورت دیگر وہ تقریبا ہر چیزجیسے ریلوے بکنگ ، فضائی ٹکٹ بکنگ سے لے کربینک کے لین دین تک میں پیچھے رہ جائیں گے۔جب ہم پاپولر کلچر کو غیر جانبدارانداز میں سمجھنے کی کوشش کرتے ہیں تب ہم آسانی سے نتیجہ اخذ کر سکتے ہیں کہ اس کے کچھ مثبت پہلو بھی ہیں :
1۔یہ جرأت مند ہے ۔۔ اگرچہ پاپولر کلچر بہت متحرک ہے ، ساتھ ہی یہ جرأت مند ہے چونکہ اس کے پیروکاروں میں زیادہ تر نوجوان ہیں۔ دلیری کی کمی کی وجہ سے ان کی گزشتہ نسلوں نے جس کا خواب نہیں دیکھاتھا، لوگ ایسے اقدامات اٹھانے میں ججھک کا مظاہرہ نہیں کرتے۔ ایک بار پاپولر کلچرکو سماجی رنگ دیا جائے اوراسے متحرک کیاجائے تو اسکا عظیم مقاصد کے لئے استعمال کیا جا سکتا ہے۔ عرب انقلابات کے دوران اس میں سرگرم لوگوں کی زیادہ تر تعداد دراصل پاپولر کلچر کی ہی پروردہ تھی۔ ان حالات کا چند دہائیوں قبل سوچنا بھی دشوار کام تھا۔
2۔کمال کی تلاش ۔۔ مسابقتی دور کی بنا پر ، پاپولر کلچر خود چاہتا ہے کہ اس کے پیروکار اپنے میدانوں میں ماہر بنیں۔ اس کی مثال مختلف اشہارات ہیں جو دکھائی دیتے ہیں۔دوسروں سے بہتر اور منفرد نظر آنے کی چاہت موجودہ پاپولر کلچر کا ایک لازمی حصہ بنتا جا رہا ہے۔
3. روح میں سکون و اطمینان ۔۔ عیش و آرام میں سکون کی تلاش قابل فہم ہے ، کیونکہ اسکا پاپولر کلچروں کے تمام ذرائع کی جانب سے کیا جاتاہے۔ لیکن مجھے یقین ہے کہ پاپولر کلچر کے پیروکاروں میں دماغ کے اس سکون کے مقابلے میں روح میں سکون کی زیادہ تلاش پائی جاتی ہے۔ کلچر کے بہت زیادہ متحرک ہونے کی، لوگوں کو روح کے سکون کی تلاش ہوتی ہے۔ چونکہ دنیا میں عیش و آرام عارضی ہے اسلئے بالآخر لوگوں کو امن اور اطمینان کے لئے اپنے اندرو ن کا رخ کرنا ہوتا ہے۔اس رجحان کو آسانی سے سمجھا جا سکتا ہے اگرہم اپنے آس پاس پائے جانے والے مختلف باباؤں کو دیکھیں۔
4. منفرد اور بہادر بنئے۔۔ پاپولر کلچر کے پیروکاروں میں ایک اور مثبت پہلوان کی منفرداور جرأت مندانہ کوششیں ہیں جس سے وہ دوسروں سے مختلف نظر آتے ہیں۔وہ اپنے دل کی خواہشات کی تکمیل میں یقین رکھتے ہیں (جو کچھ بھی ان کو پسند آجائے) اورضرورت ہو تو ایورسٹ پہاڑ پرچڑھنے میں بھی نہیں ہچکچاتے۔
پاپولر کلچر کے منفی پہلو
چونکہ ہم ایک نظریاتی تنظیم سے ہیں (کم از کم دوسروں کے مقابلے میں معاشرے کے لئے ہمارے یہاں مزید کچھ احساسات پائے جاتے ہیں) ، اس لئے ہمیں گہرائی سے اس کا مطالعہ اورتجزیہ کرنا ہوگا۔میرے خیال میںآج کے پاپولر کلچر میں مندرجہ ذیل منفی پہلو پائے جاتے ہیں۔
1. اصولوں کی کمی ۔۔ موجودہ پاپولر کلچر مادہ پرستی کے علاوہ کوئی بھی نظریاتی پس منظر نہیں رکھتاہے۔ اس میں واضح طور پر مناسب اصولوں کا فقدان ہے جو عام طور پر معاشروں کی تعمیر کرتے ہیں۔پاپولر کلچر کے پیروکار یہ نہیں جانتے اور نہیں جاننا چاہتے کہ اخلاقیات کسے کہتے ہیں، مذہب کیا کہتا ہے، سماج کیا کہتا ہے، کیونکہ انھیں اس کی زیادہ پرواہ نہیں ہے ۔وہ کلچر صحیح ہے یا غلط اس سے قطع نظراس پر عمل کیا جا رہا ہے۔اصولوں کی اس کمی کی وجہ صرف پاپولر کلچرنہیں بلکہ یہ رجحان اب عالمی ہے۔
2۔ منظم ارتقاء کی کمی ۔۔ پاپولر کلچرمیں واضح طور پر منظم ارتقاء کے عمل کا فقدان ہے۔ اس کامطلب ہے اصولوں کی کمی پیش رفت کے لئے صحیح راہ نہیں سجھاتی۔ ہوسکتا ہے کہ ٹیکنالوجی کومنظم طریقہ میں بڑھایا گیا ہو لیکن پاپولر کلچرکو نہیں۔یہ اچانک ہے ، بے صبرا ہے اور کچھ ہی دیرمیں یکسر بدل سکتا ہے۔
3 ۔ ناپائیدار اور غیر حقیقی۔۔ پاپولر کلچر کا گلیمربجائے اصولوں یا اندرونی دنیا کے انسان کے بیرونی دنیا پر پر زیادہ توجہ مرکوز کرتا ہے۔ عارضی خوشی مستقل خوشی یا اطمینان کی ضمانت نہیں دے سکتی۔
معاشرے کی عمارت میں کلچر کا کردار
آئے معاشرے کی تعمیرمیں کلچر کے کردار کو سمجھنے کی کوشش کریں۔ دراصل معاشرے کی بیرونی شکل و صورت ہی کلچر ہے۔آج کل ہر کوئی کسی نہ کسی طرح پاپولر کلچر کا شکار ہے۔ بھارت کے کرکٹ میچ ، BMW کی نئی کار، فیراری 360 کار یا نیا G5 لیپ ٹاپ کی طرف کون متوجہ نہیں ہوتا ہے ۔یہ تمام باتیں آج ہمارے پاپولر کلچر کا حصہ ہیں۔آج کل سب جانتے ہیں کہ بگ باس پرکیاہو رہا ہے یا تو ٹی وی پر دیکھ کر یا اخبارات میں پڑ ھ کر، بنیادی طور پر آپ کو پاپولر کلچر سے بچنے کا کوئی راستہ کوشش کے باوجود نہیں ملتا۔
لوگ آج بھی اداکاروں یا باباؤں کی تلاش میں رہتے ہیں ، کیونکہ ہمیں کسی کی ضرورت ہے جس میں ہم بھروسہ کریں یا جن کی تعریف کریں۔ ہم یہ سوچتے ہیں کہ مصیبت کے وقت کوئی ہماری مدد کرسکے گا، انسانی ناکامیوں کے بغیر۔ کارٹونس بھی بچوں اور نوجوانوں کے لئے ہیروز ہوتے ہیں۔
انسانی بچے بھوک اور پیاس کی بنیادی ضروریات کے ساتھ دنیا میں آتے ہیں، لیکن ان کے اس رویے کی تشفی کے لئے درکار طریقوں سے ناواقف ہوتے ہیں ۔اس طرح وہ کسی بھی کلچرل علم کے بغیر ہوتے ہیں۔ انسانی نسل میں کمسن بچوں میں کلچر کو سیکھنے کی حیرت انگیز صلاحیت ہوتی ہے۔ کسی بھی خاندان میں کسی عام بچے کو رکھا جا ئے تووہ اس کلچر کوسیکھتا ہے اور اسے اپنے کلچر کے طور پرقبول کرلیتا ہے ۔ ایک بچے سے بلوغت تک آدمی کا سفر، یہ تمام عمل پاپولر کلچرسے متاثر ہوتا ہے۔ اس طرح کلچر علم اور ٹیکنالوجی کے موجودہ دور میں نہ صرف تشکیل افراد بلکہ معاشروں کی تشکیل کی بڑی قوت ہے ۔
ایک حدیث کا مفہوم ہے۔ ہر بچہ اپنی فطرت پہ (مسلمان) پیدا ہوتا ہے مگر اس کے والدین اسے نصرانی یا یہودی بنادیتے ہیں۔
منفی اثرات سے کیسے بچا جاسکتا ہے؟
سب سے مشکل سوال یہ ہے کہ پاپولر کلچر کے منفی اثرات سے کیسے بچا جاسکتا ہے اور اس کے مثبت پہلوؤں سے کیسے فائدہ اٹھایا جاسکتا ہے۔ جواب آسان ہے، ہمیں پاپولر کلچرکے اصل چلانے والے کا کردار نبھا نا ہوگا۔ ہمیں دانشوروں کا ایک ایسا بڑا گروپ چاہئے جو پاپولر کلچر کے ضمن میں ہماری راہنمائی کرے اورنئے خیالا ت پیش کرے۔ ہمیں میڈیا کی ضرورت ہے تاکہ ہم متاثر کرسکیں اور اس میدان میں داخل ہوسکیں۔ یہ سب غیر حقیقی لگتا ہے، ہے نا؟ لیکن حقیقت یہ ہے کہ مسلمانوں کے سنہری دور میں، یہی وہ لوگ تھے جنہوں نے انسانی سائنس اور ٹیکنالوجی کے تقریبا ہر میدان میں دنیا کو پاپولر کلچر دیا تھا۔ بنیادی سطح پر، مجھے لگتا ہے کہ ہم کم از کم ان چیزوں کو کر سکتے ہیں :
۱۔ نئے اصولوں کو فروغ دینے کے لئے اورپاپولر کلچر پر مثبت طریقیسے اثرانداز ہونے کے لئے غور و فکر۔
۲۔ مختلف عملی اقدامات کے ذریعہ اسلامی تعلیمات، اخلاق و اقدار، اور اللہ کا خوف لوگوں میں داخل کر نا اور اس کے لئے غور و فکر۔
* متبادل کلچرکی ضرورت ہے.اس متبادل کی تعمیر میں SIO کیا کردار ادا کرسکتی ہے؟
آج کل کے پاپولر کلچر میں مختلف بڑی کمیاں ہیں اور اس کے اثرات نوجوانوں کے ذہنوں کو فاسد کر رہے ہیں۔ یہ ایک انسانی وجودکو محض ایک مادی وجود میں تبدیل کررہا ہے جس کا مادی فوائد کے لئے استحصال کیا جاسکتا ہے اور اللہ تعالی کی قربت سے انسانیت کودور لے جارہا ہے۔ یہ ضرور ہوگا چونکہ اس کلچر کے کرتا دھرتا خدا سے ڈرنے والے لوگ نہیں،وہ مسلمان نہیں ہیں۔اگر ہم اپنی اگلی نسل کو اسلام کاسچا پیرو بنانا چاہتے ہیں تو ہمیں پاپولر کلچر کے اقدامات کے ذریعہان اسلامی اصولوں یا تعلیمات کو متعارف کرانے کے انتظامات کے بارے میں سوچنا ہوگا۔میرے خیال میں،بحیثیت ایک فرد، والدین یا ایک تنظیم کے طور پر کم از کم ان چیزوں کے ساتھ شروعات کی جاسکتی ہے۔
1. تازہ ترین پاپولر کلچر، آلات اور ٹیکنالوجی سے واقفیت۔
2. پاپولر کلچر کے ان اوزار سے واقفیت جن کاہماریمقاصدکے لئے استعمال کیا جا سکتا ہے، ان کو تلاشکیا جائے۔ اس کے لئے عظیم دماغوں کی ضرورت ہے۔
3.ان آلات یا معلومات کو ہٹایا جائے جس سے دماغ پر منفی اثرات ہوتے ہیں۔
4. نوجوانوں کی زندگیوں کو ‘مشن’ فراہم کیا جائے ، جس کے نتیجے میں انہیں اپنی ذمہ داریوں کو سمجھنے میں مدد ملے گی۔
5. کلچر کی بنیاد کے طور پر ‘علم’ کو فروغ دینا۔ اس طرح، ہم اسلام کا صحیح علم قرآن اور حدیث کے ذریعے دے سکتے ہیں۔
اختتام
اسلام ذاتی عبادت تک محدود نہیں ہے، یہ زندگی گزارنے کے طریقہ کا نام ہے۔ یہ انسانی زندگی سے متعلق تمام خصوصیات اور جہتوں کا احاطہ کرتا ہے۔ اس کے پیروکار کے طور پر ہمیں سمجھنا ہوگا او ر ہمارے ارد گرد کے ماحول میں اس بات کو پھیلانا ہوگا۔کلچر ہو یا سائنس، ارضیات یا جغرافیہ چاہے جو بھی میدان ہو ،ہمیں ہماری نسلوں کو بلندیوں تک پہنچانا ہے جسکااللہ تعالی کی طرف سے وعدہ کیاگیا ہے؛
جو لوگ تم میں سے ایمان لائے اور نیک کام کرتے رہے ان سے اللہ کا وعدہ ہے کہ ان کو ملک کا حاکم بنادے گا جیسا ان سے پہلے لوگوں کو حاکم بنایا تھا اور ان کے دین کو جسے اس نے ان کے لئے پسند کیا ہے مستحکم و پائیدار کرے گا اور خوف کے بعد ان کو امن بخشے گا وہ میری عبادت کریں گے اور میرے ساتھ کسی اور کو شریک نہ بنائیں گے اور جو اس کے بعد کفر کرے تو ایسے لوگ بدکردار ہیں۔(سورہ نور :55).
اگر ہم اپنی پوری کوشش پاپولر کلچر کے ذریعے اسلامی تعلیمات کو فروغ دینے میں لگاتے ہیں ،اس سے نہ صرف ہماری نسل کو اسلام کو بہتر انداز میں سمجھنے میں مدددملے گی بلکہ ساتھ ہی ساری انسانیت کے لئے مفید ثابت ہوگا۔ وکی پیڈیاسے ذیل کا اقتباس اس بحث کے اختتام کے لئے انتہائی موزوں ہے:
’’اسلامی گولڈن ایج کے دوران (750 عیسوی ۔۔ 1258 عیسوی) اسلامی دنیا کے فلسفیوں، سائنسدانوں اور انجینئرز نے ٹیکنالوجی اور کلچر کے لئے بہت زیادہ خدمات انجام دیں۔ پچھلی روایات کے تحفظ اور ا ن میں اپنی جانب سے نئی دریافتوں کو شامل کرتے ہوئے۔ سائنسی اور دانشورانہ کامیابیوں میں اس دور میں بہت نکھا ر آیا‘‘۔

فیروز پٹیل ۔ ممبئی

اجتماعی تقاضے:
مخلوط سماج میں توازن کے اجتماعی تقاضوں کے تحت درج ذیل تقاضے بنیادی اہمیت کے حامل ہیں۔
(1) اجتماعی شعور کی بیداری
(2) حقوق اور ذمہ داریوں کا احساس
(3) us اور them کی نفسیات کا تدارک
اجتماعی شعور کی بیداری:
اجتماعی شعور سے بنیادی طور پر وہ شعور مراد نہیں ہے جو فرداً فرداً شعور کی جمع کا مظہر ہو بلکہ یہ شعور انفرادی آرا میں اختلاف کے باوجود کسی مخصوص نکتہ کے تحت اپنے سماجی عمل کو مجموعی شعور سے ہم آہنگ کرنے کا نام ہے۔ ایک بہت چھوٹی سی مثال سے اس بات کو سمجھانے کی کوشش کی جاسکتی ہے۔ مغرب کے زیادہ تر ملکوں میں عوامی جگہوں پر سگریٹ نوشی نہ کرنا اجتماعی تہذیبی شعور کا مظہر ہے۔ یعنی سماج یا اس ملک کے افراد گو کہ انفرادی طو پر عوامی جگہوں پر سگریٹ نوشی کرنے کے قائل ہوں لیکن اجتماعی شعور کا احترام کرتے ہوئے اس مظہر سے یا فعل سے گریز کرتے ہیں اور بعض اوقات یہ رضاکارانہ طور پرہوتا ہے یعنی کسی خارجی دباؤ پولس، قانون، انتظامیہ کے بغیر۔
ہمیں مسلمانوں میں مخلوط سماج میں رہنے اوبسنے کے لیے درکار اجتماعی شعور کو پروان چڑھانے کی ضرورت ہے۔ اس اجتماعی شعور کے اجزا میں بنیادی طور پر دو چیزیں بہت اہم ہیں۔
(1) حقوق اور ذمہ داریوں کا احساس
(2) us اور them کی نفسیات کا تدارک
حقوق اور ذمہ داریوں کا احساس:
بحیثیت مجموعی ہمیں افراد سماج کو یہ بتانا پڑے گاکہ ہم حقوق کی پکار اسی وقت لگا سکتے ہیں جب ہم ذمہ داریوں کو ویسے ادا کررہے ہوں، جیسے کہ ادا کرنے کا حق ہے، یہ اجتماعی شعور کی آبیاری میں بڑا اہم موضوع ہے۔
محض حقوق کے لیے نعرہ بازی کرنا، مختلف امور میں مراعات طلب کرنا بے فائدہ ہوجاتا ہے، جب بڑی سطح پر ذمہ داریوں کی ادائیگی میں کوتاہی ہورہی ہو۔ مثلاً ایک مخلوط سماج میں رہتے ہوئے پہلا حق جو اکثریتی فرقے کو جاتا ہے وہ غالباً پاسداری مذہب، عقائد ورسومات کا ہے۔ پاسداری سے کیا مراد ہے، یہ کوئی متعین شئے نہیں ہے۔ افراد حالات، سماجی و ثقافتی منظرنامے اس بات کا فیصلہ کرتے ہیں کہ پاسداری کی سطح کیا ہوگی۔ حضرت علیؓ اور حضرت عمرؓ کے اقوال کا مفہوم غالباً اس کی بہترین ترجمانی ہے کہ نہ ظلم کرو، نہ ظلم ہونے دو۔ اسلام کا زریں اصول تو بہر حال موجود ہے ہی کہ زیادتی نہ کرو، فساد نہ پھیلاؤ اور اگر بدلہ لینا ہو تو اتناہی لوجتنا کہ ظلم کیا گیا ہو۔ واضح رہے کہ فساد، زیادتی اور ظلم یہ وسیع اصطلاحیں ہیں اور قرآن ان اصطلاحوں کے مختلف معنی بتلاتا ہے۔ بتوں کو برا نہ کہنے میں فسادکا صرف یہی پہلو نہیں ہے کہ وہ بھی پلٹ کر اللہ کو برا کہیں گے۔ یہ صرف اس کا ایک پہلو ہے لیکن دراصل اس میں یہ بات بھی شامل ہے کہ اسلام دین حق کی طرف دعوت دینے کے بعد قبول حق کے سلسلے میں زبردست اور غیرمعمولی اعتدال رکھتا ہے ۔اسلام انسان کی فطرت کے تقاضوں کو غیرمعمولی اہمیت دیتا ہے۔ ان تقاضوں میں سے ایک فطری تقاضہ یہ بھی ہے کہ انسان صحیح ہو یا غلط، اپنے ماں باپ، خاندان اور آبائی مذہب اور شعائر مذہب سے زیادہ لگاؤ رکھتا ہے۔ اسلام بغیر اس کے سیاق و سباق میں جاتے ہوئے اس کی عزت کرتا ہے۔ چنانچہ وہ انسان کی مذہبی انا کو ٹھیس پہنچانے والی ہر شئے سے مومنوں کو روکتا ہے۔ قل یا ایہا الکافرون میں جس براء ت کا اظہار ہے وہ انسانوں کو غور و فکر کی دعوت دینے اور شعوری عمل کے لیے تمام درکار لوازمات جیسے وحی، رسول اور نفس مطمئنہ، فطرت سیلم دینے کے بعد ہے۔ اس کے بعد معاملہ اللہ اور اس کے بندے کا ہے۔ دوسرا کوئی انسان درمیان میں کہیں نہیں ہے۔
مسلم اکثریتی ممالک میں بابری مسجد کے سانحے کے بعد کیا ہوا؟ اسی کا ایک دوسرا پہلو یہ بھی ہے کہ 9/11 کے بعد امریکہ میں مخصوص مذہبی شناخت حتی کہ مخصوص ملکی شناخت والے افراد کے ساتھ کیا کیا زیادتیاں ہوئیں۔ سب جانتے ہیں کہ کسی بھی مخلوط سماج میں حقوق اور ذمہ داریوں کا احساس بنیادی ستون کی حیثیت رکھتا ہے۔ جتنا یہ احساس عوام میں قوی ہوگا، جس قدر اس کا نفوذ عوام کی شعور کی سطح پر اثر پذیر ہوگا اسی قدر مخلوط سماج اعتدال اور توازن سے عبارت ہوگا ورنہ بہ اعتبار تعداد و مواقع تصادم ہوں گے اور ضرور ہوں گے۔
ہم (us ) اور وہ(them )کی نفسیات کا تدارک:
مخلوط سماج میں وہ اور ہم کی نفسیات سم قاتل کا درجہ رکھتی ہے۔ اس نفسیات کے چلتے ہی مختلف گروہ اپنے vested interest مذہبی اقلیتی و اکثریتی دونوں فرقوں سے حاصل کرتے ہیں۔ (اس نفسیات پر تحقیق ایک زبردست میدان ہے۔)
اسلام بنیادی طور پر اس نفسیات کی جڑ ہی پر وار کرتا ہے۔ وہ پوری بنی نوع انسان کو ’’الخلق عیال اللہ‘‘ سے تعبیر کرتا ہے۔ سارے انسانوں کو ایک آدم اور حوا کی اولاد بتاتا ہے۔ ہاں یہ ضرور ہے کہ وہ انسانوں کو مومن اور کافر کے خانوں میں بانٹتا ہے لیکن ان خانوں میں جو انسان آتے ہیں وہ شعوری بنیادوں پر تقسیم ہوکر آتے ہیں۔ غالباً یہ تقسیم غیر شعوری بنیادوں پر لاگو نہیں کی جاسکے گی ۔لیکن پھر بھی اللہ اس تقسیم کی بنیاد پر مادی اسباب و وسائل اور مادی ترقی اور بقائے زندگی کے مواقع کسی گروہ کو کم یا زیادہ نہیں دیتا۔
چنانچہ بحیثیت مومن یہ بات صرف ہندوستان ہی نہیں بلکہ تمام عالم کے مسلمانوں کو سمجھانے کی ضرورت ہے کہ انسانوں میں ’وہ‘ اور ’ہم‘ نہیں ہوتے۔ انسان اللہ کی مخلوق ہے، اس کا کنبہ ہے، صرف یہی ایک بات اس بات کی ضمانت دینے کے لیے کافی ہے کہ محض رنگ، نسل اور عقائد کی بنیاد پر اس سے مختلف امور زندگی میں تعصب نہیں برتا جائے گا۔ ’’تعاونوا علی البرو التقوی‘‘ میں غالباً کہیں سے مذہب کی قید نہیں لائی جاسکتی۔ خو داللہ کے رسولﷺ کی پوری سیر ت چند استثنائیات کو چھوڑ کر مذہب کی بنیاد پر تفریق نہ کرنے اور نہ ہونے دینے کا بہترین نمونہ ہے۔ بعد کے ادوار سے جو لوگ اس کی مثالیں لاتے ہیں، ان کی نوعیت زیادہ تر یا تو سیاسی ہے یا پھر انفرادی اجتہاد سے عبارت ہے یا پھر ثقافتی جبر سے اعراض کے نتیجے میں ہے۔ ’’ہم اور وہ‘‘ کی نفسیات کے نقصانات ہم جا بجا دیکھ سکتے ہیں۔ اس نفسیات کی بنیاد پر کشمکش انواع عالم ہے۔ خود مسلمانوں میں جماعتی، سیاسی اور فروعی اختلافات کی بنیاد پر us اور them کی نفسیات کا اثر دیکھا جاسکتا ہے۔ اس نفسیات سے اسلام کی تصویر، مسلمانوں کی تصویر مسخ ہوتی ہے اور عوام الناس اللہ کی رحمت سے قریب ہونے کے بجائے دور ہوتے چلے جاتے ہیں۔
اس نفسیات سے زبردست نقصانات ہیں۔ them کے گروہ میں پائے جانے والے افراد، اداروں اور ان کے کاموں سے فائدہ نہیں اٹھایا جاسکتا۔ تخلیقیت اور ندرت کے فریم سکڑ جاتے ہیں۔ سیکھنے کے مواقع کم ہوجاتے ہیں، ارتقاء کی راہیں بند ہو جاتی ہیں۔
مخلوط سماج میں توازن کے لیے درکار اجتماعی تقاضوں میں ایک اہم جہت خارجی تقاضوں کی بھی ہے۔ یہ خارجی تقاضے مذہبی اقلیت کے سیاسی اور ثقافتی امور سے متعلق ہوتے ہیں۔ دنیا کی وہ تمام جمہوریتیں جہاں مخلوط سماج پائے جاتے ہیں ان میں سیاسی سطح پر مذہبی اقلیت کے فعال رول کی بڑی اہمیت ہے اور یہ فعال رول ان کے ارتقاء کے لیے ضامن قرار دئیے گئے ہیں۔
وہ ممالک جہاں مذہب کی بنیاد پر سیاست کا رخ متعین ہوتا ہے وہاں پر مخلوط سماج میں توازن کے لیے سیاست کارول انتہائی اہمیت کا حامل ہوجاتا ہے۔ ہندوستان کے تناظر میں اس منظر نامے پر بحث بالکل ایک الگ موضوع ہے اور یہ مضمون غالباً اس کا متحمل نہیں ہوسکتا۔ مختصراً یہ بات سمجھ لینی چاہئے کہ مذہب کی بنیاد پر ہورہی سیاست کو اگر تبدیل نہیں کیا جاسکتا، تو کم از کم اسے صحیح رخ دیا جائے۔ محض مذہب اور اس سے جڑے اشوز اور مسائل ہی سیاست کی بساط پر کلیدی حیثیت میں شامل نہ ہوں بلکہ مذہبی اقلیت کی سیاست کا ایک اہم ایجنڈہ مخلوط سماج میں check اور Balance کے اہم اداروں کی تشکیل، تنظیم اور موجود اداروں کا ارتقاء بھی ہو۔
مذہبی اقلیتوں کو اس بات کا احساس دلایا جا نا چاہئے کہ محض اکثریتی مذہبی اکائی سے خوف کی بنیاد پر سیاست طویل المدتی اعتبار سے کسی خاص بہتری کی ضامن نہیں۔ خوف کی نفسیات جو کہ موجودہ سیاست کا اہم ہتھیار ہے۔ اس سے عوام کو باہر لانا مخلوط سماج کے لیے ناگریز ہے۔ ورنہ یہ نفسیات غیر فطری رویوں کو جنم دیتی ہے۔ جس کے مظاہر آئے دن دیکھنے کو ملتے ہیں۔ جیسے مسلمانوں کو مخصوص کالونیوں میں مکان بنانے کی اجازت کا نہ ہونا۔ کچھ مخصوص علاقوں میں Celebraties تک کو فلیٹ بیچنے سے انکار کردینا۔ یا حالیہ بنگلور میں ہوئے واقعات، انہیں غیر فطری رویوں کی عملی مثال ہے۔ حالانکہ یہ نفسیات اکثر اوقات Sponsored ہوتی ہے اور خاص آئیڈیالوجی رکھنے والے گروہ کے ذریعہ روبہ عمل لائی جاتی ہے۔
اب تک ہم نے یہ دیکھا کہ مخلوط سماج کی ایک اکائی) مذہبی اقلیت( پر اس سماج میں توازن بنائے رکھنے کے کیا تقاضے ہیں۔ اس توازن کی دوسر ی جہت مذہبی اکثریت پر لاگو ہونے والے تقاضے ہیں۔ اس کی ایک تیسری جہت بھی ہے وہ اقتدار اعلیٰ (ہندوستان کے تناظر میں دستور ہند) اور اسے چلانے والے ادارے ہیں اور ان پر لاگو ہونے والے تقاضے یہ بجائے خود ایک اہم موضوع ہے۔ لیکن فی الوقت وہ اس مضمون میں زیر بحث نہیں لائے گئے ہیں۔
مخلوط سماج میں حقیقتاً توازن اس مخلوط سماج کی دوسری اکائی مذہبی اکثریت کے تعاون و اشتراک کے بغیر ممکن نہیں ۔ یہ سوال اکثر کیا جاتا ہے کہ ایک طرف سے تقاضوں کی تکمیل اس مخلوط سماج میں توازن کیا قائم کر پائے گی؟ یا اگر یہ قائم ہے تو کیا اسے دوام حاصل ہوسکے گا؟ اس کا سیدھا سا جواب مشکل ہے لیکن یہ بات بہر حال مسلم ہے کہ چاہے مذہبی اکثریت ان تقاضوں کو پورا کرے یا نہ کرے جو کچھ فریق اول کرسکتا ہے اسے کرنا چاہئے۔ (کیوں؟ یہ ایک دوسری بحث ہے)
سب سے اول اور غالباً انتہائی اہم تقاضا جو مخلوط سماج کی دوسری اکائی پر لاگو ہوتا ہے وہ حقوق اور ذمہ داریوں کو سمجھ کر ان میں فرق کرنا ہے۔ اقتدار اعلیٰ کی رو سے (جس کی پاسداری اور وفاداری اس اکائی پر بھی اتنی ہی لازم ہے جتنی دوسری اکائی پر) وہ جن حقوق کی مستحق ہے وہی حقوق اس سے ذمہ داریوں کا بھی سوال کرتے ہیں۔ مذہبی اقلیت کے جذبات و احساسات، ان کے شعائر مذہب اور ان کے عقائد و رسومات کا احترام اس پر لازم ہے لیکن عمومی طور پر اس جانب عملاً خلاف ورزیوں سے یہ احساس دب گیا ہے۔ چنانچہ مذہبی اکثریتی عوام اکثر اس جانب متوجہ نہیں ہیں۔ اکثریتی اکائی کی قیادت کو اس جانب دھیان دینا چاہئے۔
مذہبی اقلیتوں کے مذہبی معاملات کو سمجھنا اس ضمن میں بہت اہم ہے۔ عام طور پر ہم سب نے اکثریتی اکائی کے افراد کو اسلام اور مسلمانوں کے بارے میں مضحکہ خیز غلط فہمیوں کا شکار دیکھا ہے۔ راقم الحروف کی ایک لیڈی ٹیچر نے اس سے دریافت کیا تھا کہ کیا مسلمان ہفتے میں صرف ایک بار نہا سکتا ہے اور یہ کہ زندگی میں ایک بار گائے کاٹ کر اس کا گوشت کھانا ہر مسلمان پر فرض ہے اور اور یہ کہ ہندو کو قتل کرکے جنت میں جاسکتا ہے۔ ان میں سے بعض تو Right ونگ کا پروپیگنڈہ ہے اور بعض ہمارے اجتماعی اعمال کا نتیجہ۔
Possesion کی نفسیات کو ختم کرنا/ کم کرنا۔
مذہبی اکثریت کی بیشتر عوام پروپیگنڈے کے نتیجے میں یہ سمجھتی ہے کہ وہ جہاں رہتے ہیں اس زمین پر اور اس ملک پر صرف ان کا ہی حق ہے۔ یہ نفسیات صرف ہندوستان میں ہی نہیں پائی جاتی بلکہ ہر جگہ کی اکثریتی اکائی چاہے وہ رنگ کی بنیاد پر ہو نسل کی بنیاد پر ہو یا مذہب کی بنیاد پر، اسی نفسیات کا شکار ہے مثلاً آسٹریلیا میں جہاں پر آپ مخلوط سماج کو مذہب کے سیاق سے ہٹاکر قومیت کے سیاق میں دیکھیں گے وہاں پر آپ دیکھیں گے کہ ہندوستانیوں بالخصوص ہندوستانی طلبہ سے ان کی نفرت کی وجہ (معاشی امور کے علاوہ) یہ بھی ہے کہ وہ سمجھتے ہیں یہ ان کا ملک ہے اور ان کے اس ملک میں ہندوستانی طلبہ آکر رہتے ہیں، پڑھتے ہیں، ان کے ملک کے وسائل استعمال کرتے ہیں اور انہیں Out Compete کرتے ہیں۔ Possesion کی اسی نفسیات کا مظاہرہ کینیڈا میں سکھوں کے ساتھ، امریکہ میں مسلمانوں اور ایشیائی باشندوں کے ساتھ اور یوروپ کے بیشتر ممالک میں مختلف مہاجر باشندوں کے ساتھ دیکھا جاسکتا ہے۔
اس نفسیات کو ختم کیسے کیا جائے یہ بجائے خود تحقیق کا موضوع ہے۔ بلکہ بعض دائیں بازو کے اصحاب فکر کا تو یہاں تک کہنا ہے کہ ایسا ممکن نہیں ہے اور مخلوط سماج بجائے خود ایک Utopian سماج ہے۔جو غالباً اس دنیا میں تو ممکن نہیں لیکن ان تمام نکات کے علی الرغم مخلوط سماج میں توازن کا یہ تقاضہ اہم ترین تقاضہ ہے۔
اسلام اس ضمن میں غالباً دوسرے تمام نظام ہائے حیات اور نظریات سے بہتر رہنمائی دیتا ہے۔ وہ انسانوں کو زمین کا خلیفہ بتاتا ہے، مالک نہیں۔ اور اس میں تصرف پر عدل و انصاف اور جوابدہی کے احساس کو بنیادی حیثیت دیتا ہے۔ اس سے انسانی رویہ میں بہتر ضبط پیدا ہوتا ہے۔ قرون اولیٰ کے مسلمانوں نے اس کی اچھی مثال پیش کی تھی۔
طفیلیت کی نفسیات کو ختم کرنا:
طفیلیت کی نفسیات کیا ہے۔ عام طور پر مذہبی اکثریت یہ مانتی ہے کہ مذہبی اقلیتیں ان کے ذرائع و وسائل پر طفیلیہ (Parasite) کی طرح ہیں۔ مثلاً امریکہ میں سیاہ نام حبشیوں کو اکثر Black dirt کہا جاتا ہے۔ لیکن امریکہ کو امریکہ بنانے میں ان کا رول تمام دنیا پر عیاں ہے چنانچہ یہ نفسیات انتہائی احمقانہ ہے۔ مذہبی اکثریت کو اس طفیلی سوچ پر قدغن لگانے کے لیے اقدامات کرنے ہوں گے۔ کیونکہ اس نفسیات کے ساتھ تسلیم شدہ انسانی اقدار کا اہتمام نہیں کیا جاسکتا مثلاًایک طفیلیہ کے ساتھ بھلا آپ کس طرح برابری کا سلوک کریں گے اور مساوات اور رواداری نبھا سکیں گے۔
ہندوستان میں بالخصوص جارحانہ ہندوتو کے حاملین نے اس سوچ کو پروان چڑھا یا ہے۔ اکثر مسلمانوں سے یہ کہا جاتا ہے کہ ’’تم نے پاکستان لے لیا ہے‘‘ اب وہاں جاؤ۔ اگر آپ دائیں بازوں سے متاثر لوگوں کے آس پاس رہتے اور بستے ہوں تو یہ بات آپ کے لیے عجیب نہیں ہوگی۔ مذہبی اکثریت کو یہ بات سمجھنی چاہئے کہ دستور کے تحت جو کچھ حقوق اقلیتوں کو حاصل ہیں وہ اس ملک کے شہری ہونے کی حیثیت سے حاصل ہیں، طفیلیہ کی حیثیت سے نہیں۔
اس نفسیات کے سد باب کا طریقہ بہت سادہ ہے۔ مسلمان اور دیگر اقلیتوں کو محض اقلیتوں کے مسائل کے لیے نہیں لڑنا چاہئیے،اقلیتوں کے ریزرویشن، محض اقلیتوں کی نوکریاں، محض اقلیتوں کی بہبود، محض اقلیتوں کا تحفظ، ان کے پرسنل لاء، وہی ان کی سماجی جد و جہد کا مرکز و محور نہ ہوں بلکہ ملک کی عوام،ان کے مسائل اور مسائل کا حل، اور وہ مشترکہ مسائل جو ہم سب کی زندگی کا حصہ ہیں، بحیثیت ملک کے باشندے ہونے کے ان کے لیے مشترکہ جدوجہد کریں اور اس میں اکثریتی اور اقلیتی کسی قسم کی کوئی تفریق نہ ہو، اس سلسلہ میں تعاون لیا بھی جائے اور دیا بھی جائے۔
دوسری جانب اکثریتی اکائی اس نفسیات کو ختم کرنے کے لیے عملاً اس سماجی جد وجہد میں جو اقلیتی اکائی چھیڑتی ہے اس کا تعاون کریں۔ اس سے دوہرے فائدے کی امید ہے ۔ ایک تو یہ کہ مذہبی اقلیت میں سے ghettoisotion کی نفسیات کو ختم کرنے میں مدد ملے گی۔ دوسرے یہ کہ خود مذہبی اکثریت کے اندر سے مذہبی اقلیت کے تئیں پائے جانے والی طفیلیت کی نفسیات کا سد باب ہوگا۔
مذہبی اقلیتوں میں تحفظ اور Belonging کے احساس کو پروان چڑھا نا:
مذہبی اکثریت کی طرف یہ تقاضا نہایت اہم ہے۔ ہندوستان کے تناظر میں اس کی اہمیت دو چند ہے اور یہ صرف مذہبی اقلیت ہی تک محدود نہیں ہے بلکہ جغرافیائی اعتبار سے اور علاقہ واریت کے اعتبار سے بھی اس کی بڑی اہمیت ہے۔ کئی محققین اس بات پر اتفاق کرتے ہیں کہ اقلیتوں کی ہیئت اور کمیت اور ان کے اجزائے ترکیبی مختلف ہوتے ہیں۔ لیکن کیفیتوں کے اعتبار سے ان میں عمومی طور پر کوئی خاص فرق نہیں ہوتا۔ ان میں سے ایک اہم کیفیت مذہبی اکثریت میں تہذیبی اور ثقافتی جنگ اور اجنبیت یا Non belonging کا احساس بھی ہے۔
چنانچہ اقلیت چاہے کسی بھی اعتبار سے ہو علاقہ واری، مذہبی لسانی تہذیبی یا کوئی اور ، اس میں تحفظ اور Belonging کے احساس کو پروان چڑھانا بہت اہم ہے۔ مذہبی اکثریت اس کے لیے کیا طریقے اختیار کرے یہ ماحول اور حالات پر منحصر کرے گا لیکن سماجی زندگی کے تمام ادارے مثلاََ: عدلیہ، انتظامیہ، قانون وغیرہ تمام اس کے مکلف ہوں گے اور اس کے لیے کوشاں ہوں گے، یہ ایک عمومی اصول ہے۔
اس کی اہم مثال کے طور پر اللہ کے رسولﷺ کا وہ فیصلہ ہے جو آپ نے ایک یہودی اور مسلمان کے درمیان کرایا تھا۔ (یہ فیصلہ یہودی کے حق میں ہوا تھا) اس فیصلہ کا اثر کیسا رہا ہوگا، اسے صرف وہی فرد سمجھ سکتا ہے جو مذہبی اکثریت اور مذہبی اقلیت کے درمیان یہ سوچ کر جیتا ہو کہ جانے کل کیا ہونے والا ہے۔ حالانکہ یہ ایک چھوٹی سی مثال ہے لیکن اس کے ساتھ ہی یہ تحفظ اور Trust Buildingکا ایک اہم مظہر بھی ہے۔
مخلوط سماج میں توازن کے کچھ تقاضوں کو مندر جہ بالا سطور میں بیان کیا گیا ہے۔ اب سوال یہ ہے کہ ان تقاضوں کو رو بہ عمل لانے کے لیے لائحہ عمل کیا ہو۔ سب سے پہلے تو یہ ہونا چاہئے کہ ہم انفرادی حیثیت میں ان تقاضوں کو پورا کرنے والے بنیں۔ یہ سب سے مشکل کام ہے۔ ہم سب کہیں نہ کہیں اس سلسلہ میں کوتاہ ہیں۔ یعنی ہمارا ذہنی مشاکلہ ایک خاص نہج پر ساخت پا چکا ہے۔ اس کو تبدیل کرنا کسی بھی فرد کے ذہنی ارتقاء میں ایک انتہائی اہم سنگ میل ہے ۔
انفرادی حیثیت میں ان تقاضوں کو پورا کرنے کی سعی کے ساتھ ساتھ ہم ان تمام افراد کو بھی اس جانب متوجہ کرسکتے ہیں جو ہمارے حلقہ اثر میں ہوں۔ عام طور پر ہم کبھی کبھی اتنا خود مرکوز Self Focused ہو جاتے ہیں کہ ہمیں بہت قریب اور آس پاس کے مواقع دکھائی ہی نہیں دیتے۔ ہمارے حلقہ احباب میں، گھر میں، تنظیم میں جہاں کہیں بھی موقع ملے احسن انداز میں لوگوں کو اس جانب متوجہ کرائیں۔ خود ہماری تنظیم میں بعض امور کو لے کر اگر آپ سروے کریں تو مخلوط سماج میں توازن کے تقاضوں کے تئیں آپ کو حوصلہ افزا رجحانات اور عمل کے مظاہر شاید اتنے نہ ملیں جتنے ہمارے اعلیٰ ترین مقاصد اور نصب العین کے لیے درکار ہیں۔ اس ضمن میں ذہن سازی اور ماحول سازی دونوں ضروری ہیں۔
اس سلسلے کی آخری بات یہ ہے کہ مخلوط سماج کے سلسلے میں بجائے خود کئی آرا ہیں۔ جیسا کہ پچھلے صفحات میں ضمناً اشارہ کیا گیا ہے۔ مثلاً کیا مخلوط سماج کلی طور پر ممکن ہے؟ کیا اقتدار اعلیٰ کے بغیرمخلوط سماج کو قائم رکھا جاسکتا ہے اور اس سے بھی آگے بڑھ کر کہ اسلامی شریعت میں مخلوط سماج کی کیا جہات ہوں گی؟ کیا دعوتی عمل سے بالآخر مخلوط سماج کا کوئی وجود ہی نہیں ہوگا؟ کیا عملاً ایسا ہوگا؟ مخلوط سماج میں خصوصی شرعی احکام کو کس طرح رو بہ عمل لایا جائے گا؟
مخلوط سماج اور اس سے جڑے مختلف پہلوؤں پر زبردست تحقیقی کاوشیں جاری ہیں۔ ان کا وشوں میں ہمارا حصہ، بین الاقوامی سطح پر مخلوط سماج پر ہورہی بحثوں میں ہماری سرگرم شمولیت، اس اہم موضوع پر ہماری بیداری اور اس سے لگاؤ کا مظہر ہوگی۔

ڈاکٹر محمد رضوان

محمدآصف علی، بگدل

مولانا محمد اسماعیل فلاحی، شیخ التفسیر، جامعۃ الفلاح ، اعظم گڑھ

سعود اعظمی، جامعہ اسلامیہ، شانتاپرم

جنرل سکریٹری کا دورۂ انڈمان نکوبار
جنرل سکریٹری ایس آئی او آف انڈیا برادر پی ایم صالح نے جزیرہ انڈمان نکوبار کا ایک تفصیلی دورہ کیا، اس موقع پر آپ نے وہاں ایک ہفتہ قیام کیا، اس موقع پر ایس آئی او اور جماعت اسلامی کی جانب سے مختلف اہم پروگرامس کا انعقاد کیا گیا۔ جنرل سکریٹری نے طلبہ سے خطاب کرتے ہوئے کہا کہ سماج کی تعمیر نو کے لیے طلبہ تنظیم کا کردار بہت ہی اہمیت کا حامل ہے، آپ نے اس سال کے اہم ترین انقلابات اور تحریکوں پر روشنی ڈالتے ہوئے کہا کہ مصر ، تیونس ، لیبیا سے لے کر اکیوپائی وال اسٹریٹ مہم تک نوجوانوں کا کردار کافی اہمیت کا حامل ہے۔

مہاراشٹر نارتھ زون کا لیڈرس ٹریننگ کیمپ
ایس آئی او مہاراشٹر نارتھ زون کی جانب سے صدور یونٹ اور نظمائے ضلع کا ایک شاندار تربیتی کیمپ ۷؍۸؍ جنوری کو شہر ناندورامیں منعقد ہوا، مرکزی سکریٹری برادر شوکت علی نے خطاب کرتے ہوئے ذمہ داران یونٹ کو احساس ذمہ داری کی جانب متوجہ کیا، اس دو روزہ کیمپ میں قیادت کی خصوصیات، خوبیاں اور فیصلہ سازی کے لیے مطلوبہ کردار اور اس کے سلسلہ میں درپیش نزاکتوں پر گفتگو پیش کی گئی۔

ایس آئی او ممبئی ڈویژن کا تربیتی کیمپ
ایس آئی او ممبئی کی جانب سے ممبران اور منتخب اسوسی ایٹس کے لیے دو روزہ تربیتی کیمپ کا انعقاد کیا گیا۔جس کا مقصد کیڈر میں اسلام کی خدمت کے جذبہ کو پروان چڑھانا ، دعوت ،تزکیہ ، تنظیم اور کیمپس کے کاموں کی تفہیم اور کیڈر کی صلاحیتوں کو مزیدنکھارنے کی کوشش تھا،پروگرام کا انعقاد گورائی بیچ پر بتاریخ ۷؍۸؍ جنوری ۲۰۱۲ء ہوا۔
جناب راشد صاحب نے ” نماز اور صبر سے مددلو” کے عنوان پر کیڈر کی بہترین رہنمائی کی، رفقاء کو مختلف تفویضات بعنوان “ISKCON” ، “LOKPAL”،” “RTE دئیے گئے تھے جن پر رفقاء نے روشنی ڈالی۔گروپ ورک کے طور پر معروف و منکر اور “TAZKIY & ACTIVISM” پر مباحثہ بھی رکھا گیا۔بعد ازاں ایک تقریر بعنوان ” سیرت عمر فاروقؓ ” رکھی گئی جس میں عبد الحسیب بھاٹکر صاحب نے حضرت عمر فاروقؓ کی انفرادی و اہم خصوصیات کے متعلق گفتگو کی۔پہلی شب کلچرل پروگرام کیا گیا جس میں ڈرامے وغیرہ پیش کیے گئے۔اگلے دن کا آغاز نمازِ فجر سے ہوا، جناب شیح ہمایوں صاحب نے تزکیہ نفس پر درسِ حدیث پیش کیا۔ برادر عبد القدیر نے ” تنظیمی شعور اور فکری ہم آہنگی”،برادر فیروز پٹیل نے سماج پرتحریک اسلامی کے اثرات اوربرادر عبد الوحید نے سماجی خدمت ادا کرنے اور سماجی فرائض کی اسلامی نقطۂ نظر سے ادائیگی پر گفتگو کی۔ اوپن ڈسکشن بعنوان” تنظیم ،اہداف مسائل اور حل” برادر علی عمران کی زیرِ نگرانی رکھاگیا۔آخر میں صدر ایس آئی او ممبئی ڈویژن برادر کامران بیگ نے ’’اسلامی بیداری اور نصب العین‘‘ پر زاد راہ پیش کیا۔
( رپورٹ:برادرانور شیخ، میڈیا سیکریٹری SIOممبئی )

کیمپس میں بڑھتے تشدد کے خلاف حلقہ مغربی بنگال کی مہم
ویسٹ بنگال کے مختلف کیمپس میں ترنمول کانگریس کی طلبہ تنظیم T.M.C.P. اور کمیونسٹ طلبہ تنظیمS.F.I. کے ذریعے ہونے والے پرتشدد واقعات میں روز بروز اضافہ ہوتا جا رہا ہے۔ گزشتہ کئی دنوں سے پروفیسرز اور پرنسپلس کے خلاف پر تشدد حملے اور تعذیب کے واقعات سامنے آرہے ہیں۔گزشتہ ایک مہینہ کے اندر ریاست کے سات کالجز کے پرنسپلس پر حملے ہوئے ہیں۔
کیمپس میں بڑھتے تشدد کے ان واقعات کے خلاف SIO ویسٹ بنگال زون نے اک طویل عرصے سے مہم چھیڑ رکھی ہے۔گزشتہ ماہ دسمبر میں “Stop violence!Promote peaceful students poolitics!” کے مرکزی موضوع کے تحت ریاست گیر پیمانے پر مہم چلائی گئی جس میںSIO کے مرکزی قائدین نے بھی شرکت کی۔اس سلسلے میں ۱۲؍ دسمبر کو کلکتہ میں ایک بڑی طلبہ ریلی اور مظا ہرے کا انعقاد کیا گیا۔اس کے علاوہ بڑی تعداد میں کیمپس کے اندر ‘Students Gathering’ , ‘Corner Meetings’ , ‘Wall Writings’ اور وسیع پیمانے پرہینڈ بل کی تقسیم جیسے مختلف پروگرام انجام دیئے گئے۔ٹیچرز کے خلاف تشدد کے تازہ واقعات کے خلاف بھی ایس آئی او نے نوٹس لی ہے۔اس سلسلے میں ۷؍ جنوری کو ریاستی سطح پر ’یومِ سیاہ ‘ منایا گیا اور ۱۳؍ جنوری کو ‘Shame Day’ کا انعقاد کیا گیا۔
ایس آئی او کے زونل لیڈرس نے مختلف پریس کانفرنسوں سے خطاب کیا اور مختلف کیمپس پروگراموں میں شریک بھی رہے۔مہم کے دوران ایس آئی اوکی جانب سے درج ذیل مطالبے کئے گئے، واضح رہے کہ تشدد کے یہ واقعات طلبہ یونین کے انتخاب کے پس منظر میں ہورہے ہیں۔
۱۔لنگدوہ کمیٹی کی سفارشات نافذ کی جائیں۔
۲۔پوری ریاست میں طلبہ یونین کا انتخاب ایک ہی تاریخ میں منعقد ہو۔
۳۔تعلیمی سال کے آغاز پر ۱۰؍ دن کے اندر الیکشن پروسیس مکمل کئے جائیں۔
۴۔کیمپس میں مختلف سیاسی تنظیموں کا عمل دخل بند کیا جائے۔
۵۔طلبہ کے درمیان گرتے اخلاقی معیار کی طرف فوری توجہ دی جائے۔
(رپورٹ: برادر عبدالودود مالدہ)

ایس آئی او الجامعہ الاسلامیہ شانتاپرم کی حالیہ سرگرمیاں
جامعہ اسلامیہ شانتاپرم اس وقت Vibrant & Creative Campus کا سماں پیش کر رہا ہے۔سال نو کے آغاز کے ساتھ ہی مختلف سرگرمیاں اور پروگرامس کے ذریعے جامعہ کا ماحول طلبہ کی صلاحیتوں کے ارتقاء کے لیے خوب سے خوب ترہوتا جا رہا ہے۔۲؍ جنوری کی شام ایک خوشگوار شام تھی جسے ’ایک شام ہندی کے نام ‘ سے موسوم کیا گیا۔ جس میں ہندی رفیق منزل کے ایڈیٹر برادر اسداﷲ اعظمی ،سابق ایڈیٹر برادر شبلی ارسلان اوررفیق سے جڑے قلمکاروں نے اپنی ’رچنائیں ‘ پیش کیں ۔ہندی کے لئے کیرالہ کے اس اجنبی ماحول میں یہ ایک انوکھا پروگرام تھا۔اس سلسلے میں ہندی دوستوں کے اندر جوش و خروش قابلِ دید تھا۔
۳؍ جنوری کا تو پورا دن ہی جامعہ کے لئے پر نور اور طلبۂ جامعہ کے لئے پر سرور تھا۔ ایس آئی او کے مرکزی قائدین کی پوری کہکشاں جامعہ میں موجود تھی۔جوں ہی ’وائناڈ‘ سے قا ئدین کے آنے کی خبر ایریا کمیٹی کو ملی استقبال کی تیاریاں شروع ہو گئیں ۔Flags, Play Cards اور فلک شگاف نعروں سے جامعہ کے صدر دروازے پر قائدین کا پر جوش استقبال کیا گیا۔امام شافعی حال میں محترم صدرِ تنظیم برادر اظہرالدین اور دیگر ذمہ داران نے طلبہ کے جمِ غفیر سے خطاب کیا۔ وائناڈ میں ہونے والی مرکزی ریویو میٹ کے بعد مختلف حلقہ کے ذمہ داران نے جامعہ کی زیارت کی، اس موقع پر راجستھان، یوپی ایسٹ ویوپی سینٹرل کے ذمہ داران نے جامعہ کی زیارت کی، اس موقع سے طلبہ سے ملاقاتیں ہوئیں اور مختلف امور پر تبادلہ خیال بھی ہوا۔
دوسری طرف ایس آئی او کے Task Force کے زیرِ اہتمام منعقد ہو نے والے سالانہ اسپورٹس کی گہما گہمی کی گونج ۵؍ جنوری کے Grand Finale کے بعد بھی سنائی پڑ رہی ہے۔ ایس آئی او کیرالہ کی جانب سے ۱۴؍ اور ۱۵؍ جنوری منعقد ہو نے والی “Islamic Academic Conferrence” کی تیاریاں بھی تادمِ تحریر زور و شور سے جاری ہیں۔ اس کانفرنس کے پیش نظر جامعہ اور اس کے اطراف میں ’یومِ صفائی کا اہتمام کیاگیا جس میں ایس آئی او اردو یونٹ کی شاندار کار کردگی بھی دیدنی تھی۔
(رپورٹ: برادر مصدق مبین)

شبلی ارسلان، سابق مدیر رفیق منزل، ہندی

ترجمہ: اے لوگو جو ایمان لائے ہو، اللہ کا تقوی اختیار کرو، اور ہر شخص یہ دیکھے کہ اس نے کل کے لیے کیا سامان کیا ہے۔ اللہ سے ڈرتے رہو، اللہ یقیناًتمہارے ان سب اعمال سے باخبر ہے جو تم کرتے ہو۔
تقوی ایمان کی علامت ہے۔ ایمان اور تقوی لازم وملزوم ہیں،قرآن مجید میں اہل ایمان کوبار بار تقوی اختیار کرنے حکم دیا گیا ہے،اگر انسان تقوی سے محروم ہے تو اس کا مطلب یہ ہے کہ وہ ایمان کی حقیقی لذت سے ناآشنا اور تاریکی سے قریب تر ہے۔ تقوی کیا ہے؟ اس سلسلہ میں مولانا امین احسن اصلاحیؒ نے اپنی کتاب ’’حقیقت تقوی‘‘ میں بہت ہی واضح اور شاندارگفتگو کی ہے، وہ لکھتے ہیں کہ ’’حضرات انبیاء کرام ؑ جن کا اصلی کام ہی لوگوں میں تقوی پیدا کرنا تھا،انہوں نے اپنے اپنے زمانے میں لوگوں کوجس تقوی کی دعوت دی ہے وہ تقوی یہی تھا کہ لوگ اللہ کے حدود واحکام کے پابند ہوجائیں، اس کی نافرمانی وبغاوت سے توبہ کریں، نہ اپنی خواہشوں کی پیروی کریں، نہ ان لوگوں کے پیچھے چلیں جو اپنی خواہشوں کے پیچھے چلتے ہیں، زندگی کے تمام گوشوں میں اس قانون کی پیروی کریں جو اللہ نے اتارا ہے اور اس بات سے ڈرتے رہیں کہ اس زندگی کے بعد ایک اور زندگی ہے جس میں ہر شخص کو خدا کے سامنے اپنے اعمال کی جوابدہی کرنی پڑے گی اور ہر شخص کی نیکی یابدی اس کے سامنے آئے گی‘‘۔(حقیقت تقوی: ص:۷۲)
ایک مرد مومن سے اس بات کا مطالبہ ہے کہ اس کی پوری زندگی اللہ سے ڈرتے ہوئے اور اس کے حدود کی پابندی کرتے ہوئے گزرے۔ ایک شخص جو مومن ہونے کا دعوی تو کرتا ہے لیکن کچھ ظاہری اعمال اور افعال پر اکتفا کربیٹھتا ہے، اس کے دل میں اللہ کا خوف، اس کے حدود کی پابندی اورمنکر چیزوں سے بچنے اور معروف چیزوں کو پھیلانے کا جذبہ موجود نہیں ہوتا، جان لیجئے کہ اس کی کشتی بھنور میں ہے اور ایک ہلکی سی موج اسے غرقاب کردینے کے لیے کافی ہے۔
تقوی اور فکرآخرت کے درمیان بہت ہی گہرا رشتہ پایا جاتا ہے، اس بات کو ہمیشہ مدنظر رکھنا چاہئے کہ روز آخرت کی کامیابی کا دارومدار اسی تقوی پر ہے، جس روز کوئی بھی شخص دوسرے کے کام نہیں آئے گا، اس دن انسان کا اعمال نامہ ہی اس کے لیے سب کچھ ہوگا، قرآن مجید میں ہے: ’’اس دن بھائی اپنے بھائی سے دُور بھاگے گا۔ اور اپنی ماں اور اپنے باپ سے۔ اور اپنی بیوی سے اور اپنے بیٹوں سے‘‘۔
ذرا رک کر سوچیں!! احتساب کریں کہ صبح وشام کی سرگرمیوں میں ہم اللہ رب العزت کو کس قدر یاد رکھتے ہیں، اپنے دل کو ٹٹول کر دیکھیں کہ اس کے دین کی خاطردن بھر کی جدوجہد میں کیا کچھ کرتے ہیں، اپنے اعمال کا جائزہ لیتے رہیں کہ ہم اللہ کے حدود کی پابندی کررہے ہیں یا اللہ کے مقررکردہ حدود کو توڑرہے ہیں۔
آئیے عہد کریں کہ ہم اللہ کے حدود واحکام کے پابندی کریں گے، اس کی نافرمانی وبغاوت سے توبہ کریں گے، نہ اپنی خواہشات کی پیروی کریں گے، نہ ان لوگوں کے پیچھے چلیں گے جو اپنی خواہشات کے پیچھے چلتے ہیں، زندگی کے تمام گوشوں میں اس قانون کی پیروی کریں گے جو اللہ رب العزت نے اتارا ہے اور اس بات سے ڈرتے رہیں گے کہ اس زندگی کے بعد ایک اور زندگی ہے جس میں ہر شخص کو خدا کے سامنے اپنے اعمال کی جوابدہی کرنی پڑے گی اور ہر شخص کی نیکی یابدی اس کے سامنے آئے گی۔
(محمد عاصم، جے پور،راجستھان۔)

ڈاکٹر محی الدین غازی

غزل
دھواں دیتے چراغوں کو بجھادینا کہیں بھی ہو
اندھیرا ہو چراغوں کو جلا دینا کہیں بھی ہو
روش اپنی نہ بدلی ہے نہ بدلیں گے کبھی یارو
یہی ہے فیصلہ اپنا سنادیناکہیں بھی ہو
نہ شکوہ کوئی اوروں سے نہ کوئی تم گلہ کرنا
پڑا ہو راہ میں کانٹا ہٹادینا کہیں بھی ہو
وفا کی راہ پر اپنا رکھا ہے جو قدم تم نے
جو مانگے خون وہ تم سے بہادینا کہیں بھی ہو
وفا کی راہ میں تم کوضرورت سر کی میرے ہو
اسد ہوجائے گاحاضر بلالینا کہیں بھی ہو
اسداعظمی

جشن آرزو
(مصر میں الاخوان المسلمون کی طویل آزمائشوں کے بعد پیش رفت کے پس منظر میں )
لہو، لہوہے، کبھی رائگاں نہیں جاتا
بھلے ہی دیر سے ہو
رنگ لاکے رہتا ہے
لہو، جو ظلم سے سفاکیوں سے بہتا ہے
لہو، جو برسو ں بہا قاہرہ کی سڑکوں پر
لہو، جو محبس وزنداں میں محو رقص رہا
لہو، جو گرتا رہا دار کے ستونوں سے
لہو، ہزارہا اخوان جانثاروں کا
لہو، جو منہ کو لگا تھا جمال ناصر کے
لہو، جو جبر کا سادات کے نشانہ رہا
لہو، جو حسنی مبارک کو تھا بہت مرغوب
لہو، جو بہتا رہا، بہتا رہا، بہتا رہا
یہاں تلک کے وہ دریائے بے کنار بنا!
مگر مشیت ونظم خدائے برتر ہے
اسی میں ڈوبنا فرعون کا مقدر ہے!
لہو، جو بہتا رہا ہے وہ سرخ رو ہوگا
خوشا! اے اہل وفا جشن آرزو ہوگا
انتظار نعیم

اعتدال اور توازن
نئے سال کا پہلا شمارہ نظر نواز ہوا، موضوع ہے ’’اعتدال اورتوازن‘‘۔ یہ اعتدال اور توازن رفیق اور اس کے رفقاء کی پہچان رہی ہے، شائد یہی وجہ ہے کہ ہمارے قدیم قدیم رفقاء جناب ایس امین الحسن صاحب، جناب سعادت اللہ حسینی صاحب، جناب ڈاکٹر رضوان صاحب، جناب ڈاکٹر محی الدین غازی صاحب اور دیگر رفقاء اپنی ساری مصروفیات کے باوجودبہت زمانے کے بعد ایک ہی شمارے میں اعتدال اور توازن کے ساتھ حق رفاقت ادا کرتے نظر آئے۔ یقیناامین صاحب نے اس مضمون کے لیے کسی پروگرام کو ملتوی کیا ہوگا، سعادت صاحب نے کسی میٹنگ میں شرکت سے معذرت کی ہوگی، ڈاکٹر رضوان صاحب نے اس کے لیے اپنے وطن کا ایک خیالی سفر کیا ہوگا، غازی بھائی نے رات بھر جاگ کر امین صاحب کی کتاب ’’نفس کا تزکیہ۔فرد کا ارتقاء‘‘کا مطالعہ کیا ہوگا اور رات کے آخری پہر مکمل اطمینان اور سکون کے عالم میں تواصی اور صحبت صالح پر اپنی جامع اور شاندار تحریر قلمبند فرمائی ہوگی، غازی صاحب کی اختصار پسندی پر مولانا محمد علی جوہرؒ کا ایک واقعہ یاد آتا ہے، حوالہ تو یاد نہیں، البتہ اتنا ضروریادہے کہ مولانا محمد علی جوہر کسی پروگرام میں اپنا ایک طویل مقالہ لے کر پہنچ گئے، کہنے لگے کہ وقت نہیں ملا، مصروف تھا، یہی مقالہ تیار کرکے لے آیا ہوں، جب مقالہ سنا چکے تو لوگوں نے پوچھا، ارے مولانا: آپ تو کہہ رہے تھے کہ وقت نہیں ملا اور معمول کے برخلاف آج کافی طویل مقالہ پیش کیا، اس پر مولانا نے فرمایا کہ وقت نہیں ملا، اسی وجہ سے تو مقالہ طویل ہوگیا، وقت رہتا تو سوچ کر ، اختصار اور جامعیت کے ساتھ مقالہ پیش کرتا، یقیناًغازی صاحب کے مضامین ’’خیرالکلام ما قل ودل‘‘ کے مصداق ہوتے ہیں۔
تنویر احسن، مہاراشٹر

تبصرہ کا مستقل کالم
پروفیسر محسن عثمانی ندوی کی کتاب ’’عرب دنیا میں انقلابات۔ اسلامی نقطہ نظر‘‘پر دسمبر ۲۰۱۱ء کے رفیق میں ایک طویل تبصرہ دیکھنے کو ملا، تبصرہ سے معلوم ہواکہ یہ کتاب اردو زبان میں عرب انقلابات پر پہلی پیشکش ہے، تبصرہ میں کتاب کے دونوں پہلوؤں پر خاصی اچھی گفتگو کی گئی ہے، کتاب کا ایک پہلو عرب دنیا میں انقلابات کی پرزور تائید ہے، دوسرا پہلو سعودی عرب سے متعلق گفتگو ہے، جہاں مصنف اپنے مضبوط اور اصولی موقف کے برخلاف سعودی عرب میں اس قسم کی کسی بھی انقلابی کوشش کو غلط قرار دیتے ہیں،تبصرہ نگار نے کتاب کے اول الذکر پہلو کی تحسین کی ہے جبکہ دوسرے پہلو پر تنقید سے کام لیا ہے، تبصرہ نگار نے صحیح لکھا ہے کہ ’’سعودی حکومت سے متعلق گفتگو میں حرمین شریفین کے سلسلہ میں ان کی خدمات کا خوب خوب اعتراف کیا جاتا ہے، حالانکہ یہ خدمات نہ تو جائزحقوق اور مطالبات کے لیے اٹھنے والی کسی عوامی تحریک کے لیے سد باب بن سکتی ہیں، اور نہ ہی سعودی حکومت کی من مانی پالیسی کے لیے وجہ جواز‘‘۔ رفیق منزل کے تبصرے کافی اہم ہوتے ہیں، میرا مشورہ ہے کہ نئے موضوعات پر آنے والی کتب پر تعارف وتبصرہ کاایک سلسلہ شروع کردیا جائے تو قارئین رفیق کے لیے مفیدہوگا اور اس سے ان کی دلچسپی میں مزید اضافہ ہوگا۔
ارشد حسین، اعظم گڑھ

(عبدالعظیم قاسم)

ڈاکٹر صاحب
’’ڈاکٹر صاحب! کچھ رحم کھاؤ۔۔ بچے کی جان کا سوال ہے‘‘
’’ہم نے تمہارے بچے کی جان کا ٹھیکا نہیں لے رکھا ہے، سمجھے!‘‘
’’صاحب ابھی تھوڑی دیر میں ہمارے رشتہ دار پیسے لے کر پہنچ جائیں گے۔۔۔ تم آپریشن شروع کردو۔۔‘‘
’’میں نے کہا نا۔۔۔ جب تک فیس جمع نہیں ہوگی، آپریشن شروع نہیں ہوگا‘‘
جمن ڈاکٹر کے چیمبر سے باہر آگیا۔
تھوڑی دیر بعد جمن دوڑتا ہوا ڈاکٹر کے چیمبر میں داخل ہوا۔
’’ڈاکٹر صاحب۔۔ ڈاکٹر صاحب۔۔ میرا بچہ۔۔‘‘
ڈاکٹر نرسوں کے ساتھ پہنچا۔
’’کیا کریں سر؟!‘‘
’’پانی لگادو۔۔ اور گلوکوز کے ایک دو انجکشن لگادو‘‘
’’اس سے کیا ہوگا سر؟ ۔۔۔ اسے تو۔۔‘‘
’’جیسا کہہ رہا ہوں ویسا ہی کرو! سمجھے‘‘
’’یس سر‘‘
ایک گھنٹے بعد
ہسپتال میں جمن اور اس کی بیوی کی دل دوز چیخیں گونجنے لگیں۔
’’یہ کون لوگ شور مچا رہے ہیں؟‘‘
’’سر وہ۔۔ ایمرجنسی وارڈ میں جو بچہ تھا نا۔۔ وہ۔۔‘‘
’’مرگیا؟‘‘
’’جی‘‘
’’ان سے کہو کہ زیادہ شور نہ مچائیں۔۔ ایمبولینس کو فون کرو اور جتنی جلدی ہوسکے انہیں واپس بھیج دو‘‘۔

 ناصر مرتضی